Kommuneqarfik Sermersuup sumiginnaanermut atugarliornermullu tunngasunik nalunaarutit suliarineqarnissaannut atortorissaarut periusissarlu nutaaq atulerpaa. Taamaaliornikkut meeqqanik inuusuttunillu inuuniarnermikkut ajornartorsiuteqartunut atatillugu sulianik suliaqarneq sukkanerujussuanngorlunilu isumannaannerulissaaq.
Kommuneqarfik Sermersooq innuttaasunut suliamillu ilisimasalinnut, meeqqamik inuusuttumilluunniit ernumassuteqartunut, kommunimullu nalunaaruteqarniarlutik kissaateqartunut, internetikkut nittartagaq portali nutaaq pilersippaat. Nittartakkami sermersooq.gl-imi tuussavat ”Meeqqamik eqqasuuteqarpit?”
Tassanittaaq meeqqamik inuusuttumilluunniit sumiginnagaasumik atugarliortumilluunniit pasitsaassaqaruit ersiutaasinnaasunut tunngasut atuarsinnaavatit.
Tamatuma saniatigut atuarfinni, meeqqerivinni peqqinnissaqarfimmilu sulisunut meeqqanik inuusuttunillu sullissisunut paasissutissat suliarineqarput. Meeraq imaluunniit inuusuttoq atornerlugaasimaneranik imaluunniit sumiginnagaasimaneranik ersiutaasartut aalajangersimasut ilaatigut paasissutissani nassuiaatigineqarput.
Kommuneqarfik Sermersooq marsip ingerlanerani paasissutissiilluni ataatsimiigiarnissamut perorsaasunik, ilinniartitsisunik, peqqissaasunik, politiinik allanillu qanimut meeqqanik inuusuttunillu attaveqartartunik aggersaavoq. Matumani kommune sumiginnagaasunik atugarliortunillu nalunaaruteqartarneq qanoq siunissami ingerlanneqartalernissaa pillugu ilisimatitsivoq.
Akunnerit 24-t ingerlaneranni naliliineq
Siunissami nalunaarutit tamarmik meeqqanik inuusuttunillu innarliisimanermik sumiginnaanermillu pasitsaassinermik imallit Kommuneqarfik Sermersuumi aalajangersimasumut ataatsimut tunniunneqartassapput. Taamaaliornikkut meeqqat tapersersorneqarnissaannut inatsit kingulleq naapertorlugu nalunaarutit tamarmik akunnerit 24-it ingerlaneranni naliliisoqartarnissaa qulakkeerneqassaaq.
”Nuummi immikkut ittumik Nalunaaruteqartarnermi sulisunik piareersimasunik pilersitsissaagut. Tassa imaappoq, innuttaasut sulisullu ataatsimik saaffiginnittarfeqalissapput. Siornatigut nalunaarutit assigiinngitsorpassuartigut kommunimilu sulisunut assigiinngitsorpassuarnut tunniunneqartarsimapput,” oqarpoq Martha Lund Olsen, Kommuneqarfik Sermersuumi Meeqqanut Ilaqutariinnullu Ingerlatsivimmi pisortaq, nangillunilu:
”Meeqqat tapersersorneqarnissaannut inatsit tassaavoq sumiginnagaanermut atugarliornermulluunniit pasitsaassinerit ajornannginnerusumik tunniunneqartalernissaannut iliuuseqarnitsinnut pissutaasoq, tassa nalunaarutinut saaffiginnissutit assigiiaartumik suliarineqarnissaat isumagigatsigu. Meeqqavut inuusuttortavullu toqqissisimasumik isumannaatsumillu alliartornissaat kommunitut, angajoqqaat inuiaqatigiillu peqatigalugit, annertuumik akisussaaffigaarput. Periuseq nutaaq atorlugu siunissami meeqqat inuusuttullu inuunerminni aallartinnerliornissaannut navianartorsiortut ikiorniarlugit iliuuseqartarnerput pitsanngorsaavigineqassaq.”
Naliliinermi siullermi kommune piaartumik iliuuseqassanersoq nalilerneqassaaq. Meeraq inuusuttorluunniit erngerluni iliuuseqartoqanngippat annertuumik innarlerneqarnissaminut navianartorsiorpat piaartumik iliuuseqartoqarnissaa Kommuneqarfik Sermersuumit nalilerneqartarpoq.
Periutsip nutaap atorneratigut marlunnik Kommuneqarfik Sermersooq isumannaarissaaq. Meeqqat tapersersorneqarnissaannut inatsit nutaaq naapertorlugu nalunaarutinut piffissaliussaq kommunimit malinneqassasoq, kommunimilu nalunaartutit tamarmik aalajangersimasumik assigiimmillu suliarineqartassasut.
Paasissutissanik allattorsimaffik
Meeqqamik eqqasuuteqarpit? Kommuneqarfik Sermersooq nalunaarfigiuk
E-maili: meeqqavut@sermersooq.gl
Nalunaaruteqarnermi pigaartumut oqarasuaatip normua: 36 72 81.