Innuttaasunut

CAPE DORSET – eqqumiitsuliat Nunavumeersut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Issittormiut eqqumiitsuliaat Kalaallit Nunaanni takussaarpiarneq ajorput. Taamaammat Nuummi Eqqumiitsulianik Saqqummersitsiviup aamma Ilulissani eqqumiitsulianik katersugaasiviup Nunavummi Cape Dorset Inuit Art suleqatigilerpaat.

Eqqumiitsuliat Cape Dorsetimi suliat Nuummi Eqqumiitsulianik Saqqummersitsivimmi 2018-imi marsip arfineq-pingajuaniit apriilip 29-ata tungaanut saqqummersinneqassapput. Ilulissani eqqumiitsulianik katersugaasivimmi 2018-imi juunip aallaqqaataaniit aggustip 31-ata tungaanut aamma saqqummersinneqassapput.

Eqqumiitsuliortut Cape Dorsetimeersut Nunani Issittuni uumasut pinngortitarlu najoqqutaralugit alutornarluinnartunik allalersuinikkut ilusilersuinikkullu eqqumiitsuliortarput.

Naqitanik eqqumiitsuliorneq James Houstonimit isumassarsiarineqarpoq. James Houston eqqumiitsuliortuusimavoq Canadamilu naalakkersuisunit Northern Service Officeriulluni. James Houston angutit Inuit peqatigalugit naqitanik eqqumiitsuliornermik 1957-imi misileraasalerpoq. Japanimiinnermini qisummut kigartukkat naqitanik eqqumiitsuliornermut aamma isumassarsivigisimavai, tamatumani eqqumiitsuliortup titartagaa naqiterisumut tunniunneqartarsimammat. Eqqumiitsulioriaaseq taanna Cape Dorsetimut nassarsimavaa, qisulli atornagu, nunap pissarititaa naammineq pigisartik atorsimavaa – ujarak. Ujaqqanik kigartuisalersimapput, eqqumiitsulioriaaserlu stonecut-imik taaneqartalerluni. Tamatuma kingorna naqitereriaatsit assigiinngitsut pilersinneqarsimapput – stencilit, kigartuilluni assilialiorneq (radering), lithografi il.il.

Eqqumiitsuliat Cape Dorsetimi suliat tamarmik eqqumiitsuliortunit marlunnit suliaapput. Eqqumiitsuliortoq ataaseq naqiterinikkut assilisassamik titartaasuusarpoq. Titartakkat sorliit naqiterinikkut assilisassatut piukkunnarnerpaanersut sullivimmi sulisunit aaliangerneqartarpoq. Naqitereriaaseq titartaktakkamut naleqqunnerpaaq atorlugu eqqumiitsuliortup aappaa naqiterisuusarpoq.

Houston isumaqarsimavoq titartakkanik naqiteraluni eqqumiitsuliorneq Inuit saarnernik, ujaqqanik kigutinillu qiperuisarnerannut arlaatigut toqqaannartumik attuumassuteqartoq. Taamaalillutik eqqumiitsuliat pitsaassusaat qaffassarneqarsinnaallutik, Cape Dorsetip avataanut tunineqarsinnaallutik;  takornarianuinnaanngitsoq tammajuitsussatuinnaanngitsorlu, nunarsuarmili eqqumiitsuliortut suliaannik saqqummersitsiviusartunut tunineqarsinnaallutik.

Eqqumiitsuliornermik Ilinniarfik Nuummiittoq 1975-imi isuma taanna tunngavigalugu aamma pilersinneqarsimavoq, taamani Grafisk Værksted-imik taaneqarluni. Cape Dorset maligassiuisoralugu eqqumiitsuliornermik ilinniarfimmi naqiterilluni eqqumiitsuliorneq qitiutinneqarsimavoq.

Naqitanik eqqumiitsuliorfik maanna Sullivik Kinngait-mik ateqartoq 1959-imi pilersinneqarpoq. Sulliviup Kinngait-p 1959-imi pilersinneqarneraniilli eqqumiitsulianik naqitanik katersanik ukiut tamaasa saqqummersitsisoqartarpoq, sullivillu 1979-imi nittarsaassinermut immikkoortortaqalermat Cape Dorsetip avataani saqqummersitsisalerpoq.