Kommuneqarfik Sermersooq siunnersuisoqarfillu Deloitte suleqatigiillutik kommunip Tasiilami aaqqissuussaanera misissuiffigissavaat. Marlunngorneq 13. februar kommuni timersortarfimmi innuttaasunut ataatsimiititsippat, Tasiilami kikkut tamarmik siunnersuuteqarsinnaapput.
Tunumi illoqarfiit annersaanni kikkut tamarmik marlunngorpat tusarneqarnissaminnut periarfissaqarput. Kommuneqarfik Sermersooq illoqarfiup timersortarfiani innuttaasunik ataatsimiititsinermut oqallitsitsinissamullu qaaqqusivoq. Tasiilami sullissinerup siunissami qanoq pitsangoriaateqarsinnaanera oqallinnermi sammineqassaaq. Tamatuma kinguneriniartussaavaa suleqatigiinnerup pitsaanerulernera, kommunip sulinerata eqaannerulernera innuttaasullu inatsisitigut inissisimanerannik qularnaarinermik.
”Innuttaasunik sullissinermut pitsaanerutikkusupparput. Taamaammat uani suliatsinni innuttaasut ilaatinneqassapput. Tasiilami innuttaasut taamasa takkunnissaannut kaammattorusuppakka, kissaatiminnik siunnersuutiminnillu saqqummiussisinnaaniassammata. Tusarneqarnissamummi oqalliseqataanissamullu tamanna periarfissatsialaavoq,” Helene Horsbrugh, Kommuneqarfik Sermersuumi Meeqqanut Ilaqutariinnullu Ingerlatsivimmi udviklingschef oqarpoq.
Piffissaq sumilu
Tasiilami timersortarfik
Marlunngorneq 13. februar
Nalunaaqutaq 18.45-21.15
Erinarsoqatigiit tusarnaakkit suliniummilu Paamiut Asasara misilittagarineqarsimasut paasisaqarfigalugit.
Kaffeqassaaq, teeqarluni kaageqarlunilu.
Makitsilluni eqquiniaatitsinermi peqataagit!
Tasiilami nutaamik aaqqissuussineq
Kommuneqarfik Sermersooq ulluni kingullerni kommunimi pisortanik sulisunillu aamma Tunumi illoqarfiit annersaanni inuussutissarsiortunik apersueqattaarpoq. Kingusinnerusukkut kommuni Deloittelu kommunimi sulisunik workshopeqartitsissaaq.
Illoqarfiup pisariaqartitai paasiniarlugit allannguutit tamarmik suliarineqassapput. Siunertarineqarpoq najukkami nukiit periarfissallu atorlugit ingerlatsinerup siunissami qanoq aaqqissuunneqarsinnaanerata paasiniarnissaa.
”Kommuneqarfik Sermersooq suliffeqarfittut pitsanngorsartuaannassaaq. Kommuni tamaat najukkallumi ataasiakkaat eqqarsaatigalugit. Tasiilami aaqqissuussaanerup malunnaatilimmik tigussaasumillu pitsanngorsaavigineqarnissaa anguniarparput. Tasiilaq kommunimi illoqarfittut maligassiuisutut inissisimalernissaa takorloorpaput. Immikkoortortaqarfiit akimorlugit pitsaanerusumik suleqatigiissinnaaneq najukkamilu atugassarititat pitsaanerusumik atorsinnaanissaat angusariaqarpagut. Taamaalilluta innuttaasunut sullissinerput pitsaanerussaaq,” Lars Møller-Sørensen, Kommuneqarfik Sermersumi kommunaldirektøri oqarpoq.
Paasissutissat katersorneqarsimasut tamarmik, Tasiilami nutaamik aaqqissuussinissamik siunnersuutissanut pingasuusunut atorneqassapput. Tamatuma kingorna kommunimi pisortaqarfiup aalajangissavaa siunnersuut sorleq atorneqarumaarnersoq.
”Suliffeqarfik najukkanik ataasiakkaanik eqeersimaartunik imminullu napatissinnaasunik sullissisinnaasoq angorusupparput,” Lars Møller-Sørensen oqarpoq.
Kommunimi illoqarfiit sinnerini eqaallisaasoqarnissaa aamma siunertarineqarpoq. Tasiilap siulliunneqarnissaa aalajangerneqarsimavoq, sulisut innuttaasullu akornanni nutarterisoqarnissaa sakkortuumik kissaatigineqarmat.