2017-imi Tunumi takornariaqarnermi suliniutinut Sermersuumit tapiissutit agguaanneqarnerat.
Tunumi takornariaqarnerup siuarsarnissaanut Kommuneqarfik Sermersuumi inuussutissarsiutinut tapiissutinit 647.469,50 koruunit, najukkami suliuniutinut takorniaraqarnermut suliaqarnermi suliffissaqartitsisussanut tunniunneqarput.
Takornarissat amerlanerusut tikittalernissaannut nunaqarfiit tikikkuminarnerulernissaat pingaaruteqarpoq, tamannalu peqqutigalugu Tiilerilaami Kulusummilu sissiukkami majuartarfiliortoqarnissaanut aningaasaliisoqarpoq. Tiilerilaami majuartarfik inerisaanermi suliniummut kommunimit, Visit Greenland aamma Destination East Greenland suleqatigalugit 2016-imi aallartinneqarsimasumut ilaavoq.
Tasiilami illoqarfimmi issiaarfinnik sanasoqarnissaanut aamma aningaasaliisoqarpoq. Tasiilami nuna qummukajaaqartiterpoq – soorlu Tunup sinnerani aamma taamaattoq, tamatumalu takornarissat illoqarfiup iluani angallanniarneranut ajornakusoortitsisinnaavoq. Suliniut aqqutigalugu issiarfiit qulit Tunumi qamutitut ilulisilersukkat sanaartorneqassapput.
Destination East Greenlandimit niuffatsitsinerni Mid-Atlantic Tradeshow aamma Vest Nordens Travel Martimi Islandimi ingerlanneqartuni peqataatitsinissamut kommuni aamma aningaasaliisimavoq
Tasiilami innuttaasut pingasut angallammik aquttutut ilinniarnerat aningaasaliissutinit aamma akilerneqarsimapput. ”Tunumi suliffissanik nutaanik pilersitsiortornissarput assut pingaaruteqarpoq, taamaammat suliniutit uku, qularnanngitsumik takornariaqarnerup iluani iluaqutaajumaartut tapiiffigisinnaagatsigit nuannaarutigieqaara”, Kommuneqarfik Sermersumi borgmesteri, Asii Chemnitz-Narup oqarpoq.
Kalaallit Nunaata Naatsorsueqqissaartarfiata kisitsisaataasa takutippaat, ukiuni kingullerni takornarissat Tunumut aqqusaartartut kingaatsumik amerliartuaarsimasut. 2017-imilu unnuinertalimmik aqqusaartut 5.072-iusimallutik.
Qinnuteqaatinut killissaritiat
Kommunimi ornitassat pissanganarnersarigunagaata aningaasanik atuinerup, takornariaqarnerup ineriartortinneqarnerata suliffissaqartitsinerullu qaffassarneqarnissaa siunertaralugu inuussutissarsiutinut aningaasaliissutit pilersinneqarsimapput. Matumani suliniutit nuna tamakkerlugu takornariaqarnermut pilersaarummut naapertuuttut salliutillugit tapiiffiginiarneqarput. Suliniutit ungasinnerusoq isigalugu imminut napatissinnaalerumaartut aallarnisarneranni tapiissutitut aningaasaliissutit isigineqassapput.
Inuussutissarsiornermut tapiissutinut qinnuteqarfissaq marlunnik killissalerneqarnikuuvoq februaarip aallaqqaataani aamma maajip aallaqqaataani, aningaasaliissutit ukiup ingerlanerani atorneqarsinnaanissaat qularnaarniarlugu.