Ullumi 26. januar 2018, Nikolaj Heinrich 80-liilluni inuuissiorpoq.
Nuummioqatitta akornanni malunnaateqarnerpaat ilaat, qasujaallunilu inuiaqatigiinnik ukiorpassuarni sullissisooqataasimasoq, Nikolaj Heinrich 80-liilluni inuuissiorpoq. Piniartoq, aalisartoq, politikereq minnerunngitsumillu Nuummioq, nunaqqatiminit ilisimaneqarluartoq ullumi nalliussineqarpoq.
”Nikolaj Heinrich Nuummioqatitta ataqqinarnerit ilagaat. Ukiuni amerlaqisuni inuiaqatigiinnut tunniusimalluni sulisimanera eqqaamallugu, qamannga pisumik inuuiani pilluaqqorusuppara”, Kommuneqarfik Sermersuumi borgmesteri, Asii Chemnitz Narup oqarpoq.
”Nuummiut annertuumik qutsatissaqarfigaat. Puigussanngilarpummi Nikkulaat Nuup Kommunerisimasaani kingullersaalluni borgmesteriusimammat. Inuttut aalajaassusaa tunniusimasuuneralu, ukiuni taakkuni inuiaqatigiinni pisariaqartinneqarsimavoq. Inuillu Nikkulaattut ittut ataqqisassaraagut, maligassiuisuummata, inuiaqatigiinni atorfissaqartinneqarnerminnik takunnissinnaalluartut. Nikolaj Heinrich ilaqutaalu, 80-liinerani Kommuneqarfik Sermersooq sinnerlu uummammit pisumik pilluaqquakka.”, Asii Chemnitz Narup naggasiivoq.
Nikolaj Heinrich Nuummiunit piniartutut nalunnginneqarluarpoq. Ukiuni arlaqartuni Nuummi Aalisartut Piniartullu Peqatigiiffianni aamma Kalaallit Nunaanni Aalisartut Piniartullu Kattuffianni siulittaasussarsimavoq.
Issittup Partia aallartissimavaa, 1987-milu partii taanna sinnerlugu Inatsisartunut ilaasortanngorluni, 1995-ip tungaanut. Kommunalpolitikkimi aamma suliaqartuusimavoq, 2017-mi qinersineq tikillugu Kommuneqarfik Sermersuumi kommunalbestyrelsemi ilaasortaasimagami. Taassuma siornatigut Nuup Kommuniani kommunalbestyrelsimi ilaasortaasimavoq, kommunemilu kingullersaalluni borgmesteritut issiasimalluni. Nuup illoqarfittut pingaarnertut eqeersimaartutut ineriartortinneqarnissaa, Nikolaj Heinrichip kommunalpolitikeritut sulinerani qitiulluinnarsimavoq.