Kommuneqarfik Sermersuumi Sulisoqarnermut Immikkoortortaq Akissarsialerivillu nutaamik atertaarlunilu nutaamik pisortartaarpoq.
1. februar 2018 Ellen Christoffersen Kommuneqarfik Sermersuumik Sulisoqarnermut Sullissivimmi pisortatut atorfinitsinneqarpoq, immikkoortortaqarfik taanna siornatigut Sulisoqarnermut Immikkoortortamik Aningaasarsialerivittullu taaguuteqarsimagaluarpoq. Ellen Christoffersen junimi Nuummut uterluni nuussaaq qaammatinilu siullerni pingasuni-sisamani immikkoortortaqarfimmi suliniutinik suliaqarallassalluni.
2011-imi Danmarkimut nuussimavoq, 2014-imiillu University College Nordjyllandimi administrationsbacheloritut ilinniarsimalluni, tassani sulisoqarneq immikkut sammisarisimallugu. Namminerlu oqarpoq ilinniarnermi nalaani Kalaallit Nunaanni pisut qanimut malinnaavigisimallugit, nunatsinni pissutsit malinnaavigisinnaaniarlugit.
”Ilinniarninnut atatillugu Kalaallit Nunaanni pissutsit malinnaavigisimavakka suliassannullu isumasiorfissatut atorniartarsimallugit. Taamaamaallu immikkut allaaserisassara aallartilerakku Kommuneqarfik Sermersuumi suliffeqarfittut suleriaasissaq Sermersusq Ikaarlugu – Siunissaq ataatsimoorullugu, qimerloorsimavara pissanganartunik arlalinnik imaqarsorigakku”, Ellen Christoffersen oqarpoq nagillunilu ” Kommuneqarfik Sermersooq maannakkut pissanganartumik ineriartorfimmiinnerani, kommunemi sulisut peqatigalugit nutarterinissamut periarfissat takusinnaavakka, kommunemut iluaqutaasinnaasut, taamaasillunilu aamma Kommuneqarfik Sermersuumi innuttaasunut iluaqutaasinnaallutik”.
Ellen Christoffersenip Kalaallit Nunaannut uternissi qilanaaralugu ilanngullugu oqarpoq, ”Qilanaarinersaavara avatangiisit allanit nallerneqarsinnaangitsut najoqqilernissaat, ikinnutit ilaquttallu maqaasisat najoqqilernissaat, minnerunngitsumillu kalaalimernit ulluinnarsiutigileqqinnissaat assut qilanaaraara.”