Kommuneqarfik Sermersuup Tasiilami allaffia innuttaasunut sapinngisamik pitsaasumik sullissiviusussatut aaqqissuussaava? Apeqqut tamanna akissutissarsiniarlugu sullissineq kommunip misissuiffiginiarpaa siunnersuisarfikDeloitte suleqatigalugu.
”Tasiilaq tassaavoq kommunimi innuttaasumut ataatsimut aningaasanik atuiffiunerpaasoq, aammali tassaavoq naammagittaalliutinik pissarsiffiginerpaasarfipput. Tamanna pissusissamisuunngilaq, tamannalu soorunami aqutsisutut iliuuseqarfigisariaqarparput ,” Kommuneqarfik Sermersuumi kommunaldirektøri, Lars Møller-Sørensen oqarpoq.
Tasiilami ingerlatsiviup pisariaqartitaanik kissaatigisaanillu naammassisaqassaaq 2018-imi kvartalit siullianni ilaatigullu Tasiilami kommunimi sulisut suliffimmut tunngasunik sammisaqartinneqassapput aammalu aqutsisut sulisullu apersorneqartassallutik.
Tamakkua saniatigut suliarineqartut pillugit nalilersuisartussanik pilersitsisoqassaaq aammalu illoqarfinni inuussutissarsiuteqartut pingaarutilinnillu suliaqartut apersorneqassapput.
Paasissutissat katersorneqartut pingasunik siunnersuusiornissamut atorneqassapput, siunissami ataatsimoortumik ingerlatsivik najukkameersunik sulisulik qanoq aaqqissuunneqassanersoq pillugu. Taamaattumik Kommuneqarfik Sermersuumi Pisortaqatigiit aalajangissavaat, aaqqissuusseriaaseq sorleq atorneqassanersoq.
”Eqqarsaataavoq taamaaliornikkut Tasiilaq taamaalilluni Kommuneqarfik Sermersuumi illoqarfinni siuttuulissasoq. Illoqarfinni siullersaalluni nutaamik aaqqissuussiffigineqarlunilu sullissigasuartarfinngortinneqassaaq,” Lars Møller Sørensen oqarpoq.
Eqqarsaataavoq, Kommuneqarfik Sermersuumi illoqarfinni allani assingusumik aallartitsisoqassasoq. Tasiilaq illoqarfinni siullersaasussatut toqqarneqarpoq, sulisut innuttaasullu akornanni nutaaliortoqarnissaa kissaatigineqarnikuummat.