Nuummi Tasiilamilu angerlarsimaffimmi ikiorteqarneq ulloq unnuarlu Kommuneqarfik Sermersuumit neqeroorutigineqalerpoq.
Kommunalbestyrelse ulloq unnuarlu angerlarsimaffimmi ikiorteqarnermut 2,5 million kruuninik immikkoortitsivoq. Innuttaasut utoqqaanerit pisariaqartitaq naapertorlugu ikiorneqartariaqarput, tapersorneqarnissaq toqqissisimanissarlu pillugit unnukkut unnuakkullu ikiorneqartariaqarput.
Taakku 2,5 million kruunit Nuummi sundhedsassistentinut marlunnut peqqinnissamullu ikiortimut kiisalu Tasiilami sundhedsassistentimut peqqinnissamullu ikiortimut matussutaassapput.
Isumaginninnermut Suliffeqarnermullu ataatsimiititaliami siulittaasoq, Charlotte Ludvigsen: – Ulloq unnuarlu angerlarsimaffimmi ikiorteqarsinnaaneq uagutsinnut politikeriusunut toqqissisimanarpoq, soorunalimi aamma utoqqartatsinnut. Nuannaarutigivara utoqqartagut pitsaanerusumik atugaqartissinnaaleratsigit, ataatsimiititaliami siulittaasoq oqarpoq.