– Nuannaaqaanga inuit taamak amerlatigusut suliffissaannik innersuussinnaagatsigit, Siverth Lynge Majoriami suliffissaarsiuussisarfimmi sullissisoq oqarpoq. Sap. ak aallartinnerani Nuuk Transportip pisortaa Majoriamut saaffiginnippoq, taakku ilaatigut Nuummi kilisaatinik usingiaasarput.
– Pisortap aperivaatigut inunnik 60-nik kilisaatinik usingiaasinnaasunik peqarnerluta. Aammattaaq eqqaavaa inuit taakkua massakkuminngaanniit januarip naanissaata tungaanut suliffissaqartinneqarsinnaasut, Siverth Lynge oqarpoq.
– Ulluni makkunani umiarsualivimmi ulapputtunnguaqarpoq, ullummi tamapajaasa kilisaatinik tikittoqartarpoq.
Majoriap suliffissarsiuussisarfia ilaatigut Facebook aqqutigalugu sulisussarsiorpoq, akunnerillu 12-t qaangiutiinnartut ilanngussaq 200-t sinnerlugit ingerlatinneqaqattaarpoq.
– Ilaatigut suliffissarsiortut nalunngeriikkagut innersuuppagut sinnerilu sociale mediat aqqutigalugit nassaarineqarlutik. Nuuk Transportimiillu nalunaarutigineqarpoq inuit 60-it sinneqartut atorfinitsinneqareersimasut. Tamannalu nuannaarutissaavoq, Siverth Lynge oqarpoq.