2017-imi kommunalbestyrelsemi suliarisimasatsinni nuannarinersaavara, Nuummi illoqarfimmik inerisaaniarluni pilersaarutit aallartissimanerani. Nuannerpoq kommunalbestyrelsemi tamatta ataatsimoorullugu pingaarnertut illoqarfitta siunnerfia sunaanersoq aalajangeratsigu.
Suliniut nammineerluni angisoorsuuvoq immikkoortunillu arlalinnik imaqarluni. Uanga suliniummi nuannarinersaavara, sanaartornermi atugassanik igalaanillu nammineq najukkami sanaartukkanik atuinissamik aalajangersimanerput. Sanaartornermut atugassanik sanaartorfiup, tamaani nunaqareersunut suliffissaqartitsinerup ilinniarfissaqartitsinerullu annerulernissaa.
Sanaartornermi atugassanik sanaartorfissamik pilersitsisoqarnissaanik kissaat, immitsinnut qaavatigut CSR-imik pisussaaffiliinertut suliarisimavarput. Nuannaarutigaaralu suliffeqarfiit tamaaniittut tutsiuttalereermata suliniummut suleqataarusullutik.
Nammineq Nuummi inunngorlungalu peroriartorpunga. Juullimi eqqaamasamma nuannernersaraat, ningiup juullernissaanut ernutaasugut tamatsinnut kammiortarnera. Ikinngutinilu arnaq alla ukiartoq kammiorlutik aallartittarput, kamiit tamarmik tulliinit kusanarnerit. Kamiit nutaat apummut tuttarnerisa nipaa eqqaamasamma nuannernerpaat ilagaat. Juulli nuannernersaasarpoq, ningiumit nutaanik kamittaarnikuulluni naalagiarneq.