Kommuneqarfik Sermersooq 90.000 kvadratmeterinik inuussutissarsiuteqarfinnik umiarsualivimmut atasunik pilersitsivoq aammalu umiarsualivimmut taamatut angitigisumut pisariaqartinneqartunik 150 millionit koruunit nalinginut attaveqaqatigiinnermut atugassanik immikkoortitsilluni.
Tallimanngorneq septembarip 22-anni Kalaallit Nunaanni umiarsualivittaaq umiarsuarnit nunanit tamalaaneersunit tulaffiusinnaasoq, Sikuki Nuuk Harbour, pisortatigoortumik atoqqaartinneqarpoq. Tamanna pivoq annertujaamik aaqqissuussineqarneratigut, kaagillertoqarluni kaffillertoqarlunilu, taavalu Naalakkersuisut siulittaasuat, Kim Kielsen, aammalu Gustav Skifte taassumalu ernutaa, Maalia, qalermik aappaluttumik qiorsisuupput.
Umiarsualivittavia containereqarfiuvoq 47.000 kvadratmeterinik angissuseqartoq, kivittaatit angallattakkat marluk, quersuaq, allaffiit iluarsaasarfillu.
Attaveqaqatiginnermut atugassat 150 millioner koruunit immikkoortinneqarput
Umiarsualivik taama angitigisoq soorunami kisimiissinnaanngilaq, taamaattumillu Kommuneqarfik Sermersuumit umiarsualiveqarfittaami 90.000 kvadratmeterisut angitigisumik inuussutissarsiuteqarfimmik pilersitsisoqarpoq Sikukip eqqannguaniittumik – aammalu kommune pisariaqartinneqartunik umiarsualivittaami pitsassuarmi attaveqaqatigiinnermut atugassanik 150 millioner koruuninik aningaasaliissuteqarpoq, taamaalilluni umiarsualivimmiit illoqarfiup tungaanut ajornanngitsumik ingerlaartoqartarnissaa isumannaatsuutinniarlugu.
Tamatumunnga sanaartorneq aallartereerpoq. Umiarsualiviup kaajallaasarfiullu akornanni kommunimit ikaartarfiliarineqartoq naammassippat, umiarsualivimmit umiarsualivimmut angallattunut ikuallaaviup eqqaaniittoq kaajallaasarfik nutaaq ajornannginnerusumik angallaffiulernissaanut alloriarneruvoq angisooq. Umiarsualiviliartarnermut ajornaallisaaqataassaaq aamma assersuutigalugu umiarsualiveqalernerup kingunerisaanik Nuussuakkut oqimaatsunik angallattussaagaluartut Nuussuarmiunut oqilisaataassaaq.
Borgmesterip pilluaqqussutaa
Arfininngornermi umiarsualivimmi ilassinnittoqarnerani, Kommuneqarfik Sermersuumi borgmesteri, Asii Chemnitz Narup ilaatigut imaattunik oqaaseqarpoq: ”Nuummut ulloq pingaaruteqarpoq. Ulloq qilanaarisimaqaarput, pissutigalugu Nunatsinni Illoqarfiit Pingaarnersaanni umiarsualivik nutaaq pitsaasumik piumassuseqarluartumillu inuussutissarsiornikkut piumassuseqarluarnermik takutitsinerummat. Siunissaq eqqarsaatigalugu alloriarneruvoq angisooq; Umiarsualivik Nuummut Nunattalu sinneranut isaaviit nutaat pitsaasullu marluusut akornanni siulliuvoq – aappaalu tassaalissaaq Nuummi mittarfik nutaaq. … Qularinngilluinnarpara umiarsualivik ingerlatsiviulluarumaartoq Nuummilu ineriartornermut ingerlalluartumut pitsaasumut siuarsaaqataalluarumaartoq.”