Innuttaasunut

Qummoroortartunik toqqortaateqarneq inerteqqutaavoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuummi Qeqertani Nuuk Imiup tunuani containereqarfiup imaarneqarneranut atatillugu containerit pingasut qummoroortartunik annertuunik nassaarfiusimapput.

Containerit ilaat ataaseq qummoroortartunik tonsialussuarnik imaqarpoq, sinnerilu marluk aamma qummoroortartunik annertuunik imaqarlutik.

Kommuneqarfik Sermersuup qummoroortartunik nassaarneq ilungersunarluinnartutut isigaa:

”Qummoroortartunik toqqortaateqarneq inerteqqutaalluinnarpoq. Qummoroortartut taama annertutigisut sumiiffimmi inunnik sulisunik aammalumi innuttaasunut annertuumik navianartorsiortitsipput. Ikuallattoqalissagaluarpat qummoroortartut annertuumik qaartoorutaasinnaapput,” taama oqarpoq Sanarfinermut Avatangiisinullu Ingerlatsivimmi immikkoortortami aqutsisoq Vilhelm Lynge Hard.

Kommuneqarfik Sermersooq Qinngutsinni containereqarfimmut nutaamut Isuliffimmut maanna nuussuileruttorpoq. Tassani allamilu qummoroortartunik toqqortaateqarnissaq inerteqqutaavoq, tamanna innuttaasunut sanaartukkanullu sillimaniarnermut navianartorsiortitsisinnaammat.

Kommuneqarfik Sermersuup qummoroortartunik unioqqutitsilluni toqqortaateqarneq politiinut nalunaarutigereerpaa. Siunissami qummoroortartunik nassaartoqartillugu taakku aamma politiinut nalunaarutigineqartassapput.