Kommunalbestyrelsip oktobarip pingajuanni 2017-imi ataatsimiinnermini Nuuk nutaamik pingaarnertut aaqqissuunneqarnera pillugu siunnersuut 37-inik kommunimut pilersaarummut tapiliussanik siunnersuutitalik akuersissutigaa, sapaatip akunnerini 10 piffissami 11 oktobarimiit – 20 decembari 2017-ip tungaanut tamanut tusarniaassutigineqassasoq.
Nuuk nutaamik pingaarnertut aaqqissuunneqarnera pillugu siunnersuut pilersaarusiornermi toqqammaviuvoq, Nuup illoqarfiata ineriartortinneqarnissaanut pilersitsinissamut/timitaliinissamut qulakkeerinissamut aammalu Kommuneqarfik Sermersuup illoqarfiit pingaarnersaannut periusissiaanik piviusunngortitsinissamut toqqammaviussalluni.
Pilersaarusiornermi teknikkikkut allannguutaavoq kommunimut pilersaarummi Nuuk pingaarnertut ilusilernera kommunimut pilersaarutinik 37-inik siunnersuutitaqartut, Siorarsiorfimmut pingaarnertut pilersaarut naapertorlugu suliarineqartut. Suliassaqarfiit tamarmik kommunimi ineriartortitsinermut ingerlatseqatigiiffimmut NCD Nuuk City Developmentimut suliakkiissutigineqassapput, taassumalu ilaatigut kommunip illussanik titartaasarneq pillugu politikkia ilusilersuinermilu najoqqutassiissutit naapertorlugit ineriartortitseqqinnissat ingerlateqqissallugit.
TUNULIAQUTAA
Nuuk City Development Project (NCD) suliarineqarpoq Nuup Issittumi illoqarfittut pingaarnersatut siuarsarnissaa tunngavigalugu, aammalu inissialiornissanut, atuarfiliornissanut, atuarfinnut attuumassutilinnik sunngiffimmi sammisassaqartitsinernik sanaartornissanut meeqqerivinnik meeraaqqeriviutigisunik sanaartornissanut illoqarfimmi amigaataaqisunik sanaartornissamut aqqutissiuussilluassalluni.
Illoqarfimmi innuttaasut amerlassusaat maannakkut 18.000-ngajaapput, taakkulu akornanni inuppassuaqarpoq inissiani pissusissamisuunngitsuni ullutsinnullu naleqqutinngitsuni najugalinnik. Illoqarfimmut ukiut tamaasa maanna nuuttartut 200-t aamma 300-t akornaniimmata, meeqqerivinni inissat ikiliartorput, maannalu illoqarfimmi meeqqat paaqqutarineqartarnissaannut
atuarfimmilu periarfissaqartinneqarnissaannut qulakkeerinninniarneq ajornartorsiutaangaatsialereerpoq.
TUNNGAVIUSUMIK NAJOQQUTASSAQ
Nuuk City Development projekt piviusunngortinniarlugu Nuuk pingaartut aaqqissuunneqarnera kommunimut pilersaarummi sermersooq2028.gl-imi nutarterneqarnissaa pisariaqarpoq, pisariaqartumillu kommunimut pilersaarummut tapiliussamik suliaqartoqarluni.
Nuuk pingaarnertut ilusaa tassaavoq illoqarfiup pingaarnertut pilersaarusiorneqarnerani ineriartortinneqarnissaanilu aallaavittut timitaliussassat/sammineqartut. Soorlu illoqarfiup qeqqa, qitiusoqarfiit, inissiaqarfiit, inuussutissarsiuteqarfiit, attaveqaatit allallu assigisaat. Siorarsiorfimmi illoqarfiup nutaartassaata pilersaarusiornerani, Nuup pingaarnertut ilusaata aamma Siorarsiorfiup ilaatinneqarnissaanut nutarterneqarnissaa pisariaqarpoq.
Nuuk pillugu ilusissaq pingaarneq tatituumik imminullu akilersinnaasumik illoqarfimmik ineriartortitsinissamut tunngassuteqarpoq. Kommunimut
pilersaarut Sermersooq2028 aqqutigalugu sammisat nalinginnaasut pingaarnerit arfinillit pingaarnerutinneqarput
aamma ilaatigut Qinngutsinnik, sissaq sinerlugu aqqummik, illoqarfimmi akulikinnerusumik sanaartornissaq kiisalu attaveqaatit aamma illoqarfimmi
qitiusoqarfittut atuuffiit katillutik immikkut isiginiarneqartut arfineq-pingasuusut qitiutinneqarput.
Nuuk pingaarnertut ilusaata nutarterneranut pilersaarutaavoq, pilersaarutip Nuuk City Developementip ineriartortinneqarnissaata timitalerneqarnissaa, taamaasillunilu illoqarfiup nutaartassaa Siorarsiorfik qulakkiissallugu. Illoqarfiup ilaani Nuuk, Nuussuaq aamma Qinngorput meeqqeriviliorfigineqartussatut pilersaaruteqarfigineqarput. Tamakku saniatigut Qinngutta illoqarfiullu nutaartassaata Siorarsiorfiup allisaqqinnissaat pilersaarutigineqarpoq illoqarfiup qiterisaqarfianik nutaamik najukkamilu qiterisaqarfimmik, aammalu attaveqaatit annertusarneqassapput illoqarfiup nutaartaanut aqquteqartitsiniarluni.
KOMMUNIMUT PILERSAARUMMUT TAPILIUSSASSATUT SIUNNERSUUTIT 37-IT
Nuuk nutaamik pingaarnertut aaqqissuussaanera kommunimut pilersaarummut tapiliussatut siunnersuutinik 37-inik imaqarpoq, pingaarnertut immikkuualuttunillu aalajangersagartaqartunik, ima amerlatigisunik immikkoortulinnillu:
• Immikkoortut C-t 14-it
Immikkoortut ataatsimoorfiusut soorlu meeqqeriviit, illoqarfiup ilaasa qitiusoqarfii, pisiniarfiit allallu Nuummi, Nuussuarmi, Qinngutsinni Siorarsiorfimmilu illoqarfiup qitiusoqarfiini inissisimasut.
• Immikkoortut A-t arfineq-pingasut
Inissiaqarfiit Qinngutta kujasissuani inissiaqarfiit 1, taavalu Siorarsiorfimmi inissiaqarfiit arfineq-marluk.
• Immikkoortut B-t arfineq-marluk
Inuussutissarsiuteqarfiit aamma umiarsualiveqarfiit. Immikkoortut sisamat kommunip inuussutissarsiuteqarfiini pioreersuniittut aammalu immikkoortut pingasut Siorarsiorfimmiittut.
• Immikkoortut D-t arfinillit
Sanaartorfiusussaanngitsut aamma sunngiffimmi atortulersuutit. Tassaapput immikkoortut, attaveqaatinut, aqquteeqqanut sanaartorfiusussaanngitsunullu inniminnerneqartut. Immikkoortoq ataaseq Qinngutsinni aammalu immikkoortut tallimat Siorarsiorfimmi.
Nuuk nutaamik pingaarnertut aaqqissuunneqarnera
ILUSILERSUINERMI NAJOQQUTASSAQ
NCD’p immikkoortuini ineriartornermi pitsaassuseqarnissaa qulakkeerniarlugu Kommuneqarfik Sermersooq ilusilersuinermi najoqqutassaliorsimavoq.
Ilusilersuinermi najoqqutassami assersuutit innersuussinerillu atorlugit pilersaarusiarsuup qanoq piviusunngortinnissaanut nassuiaatigineqassapput. Taamaattumik illussanik titartaasartunut, ingeniørinut aamma Siorarsiorfiup piviusunngortinnissaanut politikkikkut anguniakkanik tamanik qulakkeerinissamut sullissisunut sakkussaassaaq pingaarutilik. Ilusilersuinermi najoqqutassami aallaavigineqarpoq kommunip illoqarfiit pingaarnersaannut periusissiaa illuliortaatsimullu politikkia, taavalu nutaatut, FN-ip nunarsuaq tamakkerlugu nungusaataanngitsumik
ineriartortitsisoqarnissaanut anguniagai 17-it ilisaritinneqarput. Taanna atorlugu Nuup ineriartortinneqarnissaa nunarsuatsinnut nalunaarutigisinnaavarput ataatsimoortumik oqariartuuteqarluta ataatsimoortunillu assitalersuilluta.
Ilusilersuinermi najoqqutassaq atortussaavoq eqaatsoq, ima paasillugu, illoqarfiup nutaartaani illuliat piumaneqarnerulernerisalu ineriartorneri ilutigalugit ineriartortinneqarsinnaagami, ataavartumillu nutarterneqarsinnaalluni, peqatigitillugulu ilusilersuinermi sammineqartut pilersaarutinullu takorluukkat attatiinnarsinnaallugit.
Siorarsiorfimmut ilusilersuinermi najoqqutassaq siulleq uani aaneqarsinnaavoq
OQAASERIUMASAT, NASSUIAATIT AKERLILIISSUTILLU
Oqaaseriumasat, oqaaseqaatit akerliliissutillu 20 decembari 2017 nallertinnagu uunga nassiunneqassapput plan@sermersooq.gl
NAAMMAGITTAALLIUTEQARNISSAMUT ILITSERSUUT
Kommunalbestyrelsip aalajangiinera naammagittaalliutiginiaraanni, uunga saaffiginnissutigineqassaaq:
NAALAKKERSUISUT
Aningaasaqarnermut Naalakkersuisoqarfik,
Nuna tamakkerlugu
Pilersaarusiornermut Immikkoortortaqarfik
Postboks 1037 · 3900 Nuuk
Uuma saqqummiunneqarneraniit naammagittaalliuut kingusinnerpaamik sapaatit akunneri arfineq-pingasut qaangiutsinnagit nassiunneqareersimassaaq.