Kommuneqarfik Sermersuumi Meeqqanut Atuarfeqarnermullu Ataatsimiititami siulittaasup allamiut perorsaasut kalaallinut sanilliullugit atugarisaat pitsaanerusutut oqaatigineqartut isumaqatiginngivippai.
”Ilungersunartumik inissisimaneq politikkikkut eqqunngitsumik tusarliunneqartoq.” Taamatut Kommuneqarfik Sermersuumi perorsaasut tikisitat pillugit Facebookikkut oqallisaasoq Kommuneqarfik Sermersuumi Meeqqanut Atuarfeqarnermullu Ataatsimiititap siulersuiusuata oqaatigaa.
”Matumani ajornerpaavoq, kattuffinniit politikeriniilluunniit meeqqerivitsinni sulisorpassuarnik amigaateqarnerput soqutigineqanngimmat. Eqqunngitsumik toqqammaveqarlutik avissaartitsiniarnissaq kisiat soqutigerpasippaat,” oqarpoq Nivi Olsen (D).
Kommuneqarfik Sermersooq meeqqerivimmini maanna 52-inik perorsaasunik amigaateqarpoq. Kommune ukiuni kingullerni perorsaasutut ilinniarsimasunik amerlanernik pissarsiorniarluni suliniuteqartarsimavoq. Piffissap ilaatigut perorsaasutut atorfiit, atorfimmut atatillugu inissaqartitsisunik, inuttassarsiuunneqartarsimapput, iluaqutaasimanngilarli. Taamaattumik marlunngormat KNR-imut Nivi Olsen oqarpoq, kommune danskinik perorsaasunik naammasseqqammersunik pissarsiorniarluni iliuuseqarniartoq.
Tamanna pillugu kommunalbestyrelsimi illuatungiliuttunit politikeri ataaseq allagaqarsimavoq. Facebookikkut oqaatigisimavaa, perorsaasut tikisitat ajornannginnerusumik sulisunut inissianik pissarsisinnaasut nunaqavissunut sanilliullugit. Politikerip pineqartup aamma oqaatigisimavaa, perorsaasut tikisitat najugaqavissuniit akissarsiaqarnerusartut.
”Ukiuni kingullerni marlunni meeqqerivinni sulisunut inissianik 50-inik tunniussisimavugut. Ataasiaannarluni tikisitamut sulisumut inissamik tunisisoqarsimavoq, soorunalimi aamma meeqqerivinni sulisutsinnut assigiimmik atugassaqartitsisarpugut. Tamanna aamma kommunimi politikerip ilisimasimasussaagaluarpaa,” oqarpoq Nivi Olsen.
Allaaserisaq Facebookkikkut ingerlateqattaarneqarsimavoq, inuillu hundredilikkaat mamiasuutigalugu, amerlasuullu kamallutik, oqaaseqarfigisimavaat.
”Ulluni kingullerni Facebookikkut nuanninngitsunik allatanik nalaataqartarsimavunga arlalinnillu nuanninngitsunik allaffigineqartarlunga. Tamanna qaangerumaarpara – siornatigut misigereernikuuara – nikallornartua tassaavoq, tamakku eqqunngitsut kommunimi meeqqanut eqquisunik ajornartorsiutinik aaqqiiniarnitsinnut akornutaasarmata.