Innuttaasunut

Angallatinnut nunaminertamik atuisinnaanermut akuersissut eqqaamajuk

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Maanna ukiarpoq ukiorlu qanittuararsuanngorpoq. Piffissaq manna tassaavoq angallataatillit umiatsiaaminnik ukiuunerani qaqitsinissaat. Kommuneqarfik Sermersooq ukiuunerani umiatsiaanik inissiisarnermut tunngasut pillugit makkunannga paasissutisseerusuppoq.

Nunaminertamik atuisinnaanermut qinnuteqaateqarnissaq eqqaamajuk
Angallataatilittut ilisimassavat angallaterpit qaqinnginnerani nunaminertamik atuisinnaanermik akuersissummik peqartussaagavit, tamannalu Inatsisartut inatsisaat nr. 17, 17. november 2010 Pilersaarusiorneq aammalu nunaminertanik atuisinnaaneq pillugu § 37-mi aalajangersakkat; Nunaminertanut oqartussaasunit akuersisoqarsimatinnagu nunaminertaq sunaluunniit nalinginnaasumik atorneqassanngilaq atorneqalissalluniluunniit, taamaattorli tak. § 38, imm. 4.

Kommunimi pilersaarummi allassimasoqarpat sumiiffimmi umiatsianik ilisisoqarsinnaasoq, taava utaqqiisaagallartumik nunaminertamik atuisinnaanermut akuersissummik tunniussisoqarsinnaavoq, taannalu 1. juni ukiup tullianut atuuttarluni.

Inissiinermi ungasissuttimut aalajangersakkat eqqumaffigikkit
Sanarfinermut Avatangiisinullu Ingerlatsivik, Sanaartornermut oqartussaqarfimmiit takullattaasarparput angallataatillit umiatsiaatik illumut talisimangajallugit ilisaraat. Umiatsiaat pillugit Kommuneqarfik Sermersooq-mi aalajangersakkat immikkoortoq 3-mi aalajangersagaqarpoq; Isumannaallisaaneq eqqarsaatigalugu illumiit ungasissusissat makku aalajangersarneqarput”.

Immikkoortut pingajuanni titartanertaallu pingajuanni; ”Angallat 20 fod sinnerlugit  anginerpaamillu 26 fod-inik takissuseqarpat illumiit minnerpaamik 2,0 meter-inik ungasissuseqassaaq.

Immikkoortoq pingajuat, titarnertaallu sisamaat; ”Illup eqqaamiorisap eqqaanniit angallat minnerpaamik 2,5 meter-inik  ungasissuseqassaaq”.

Kommuneqarfik Sermersooq-mi sulisut nakkutilliisapput
Piffissami aggersumi Kommuneqarfik Sermersooq-mi sulisut umiatsianik inissiisarnermut tunngatillugu nakkutilliiniarput. Siuliini ilitsersuutit malillugit angallatit ilineqarsimanngippata kommuni piginnittunut peqqussutinik tunniussiniarpoq.

Sukumiinerusumik paasisaqarusunneq
Sanarfinermut Avatangiisinullu ingerlatsivik, Sanaartornermi oqartussaqarfik
Immikkoortortami aqutsisoq, Vilhelm Lynge Hard, oqa. 36 76 42, vilh@sermersooq.gl
Teknikkikkut sulialik, Andreas Mølgaard-Christiansen, oqa. 36 74 49, amch@sermersooq.gl
Projektimik sulialik, Lillian Jensen, oqa. 36 74 23, lije@sermersooq.gl

PDF