Meeqqanut Ilaqutariinnullu Ingerlatsivik ukiormanna maajip qaammataani piviusunngormalli Helene Horsbrugh pisortaagallartutut atorfeqarpoq. Qaammatinilu marlunni tulliuttuni taanna atorfigigallassavaa, decembarip aallaqqaataaniit Martha Lund Olsenip atorfininnissaata tungaanut.
Helene Horsbrughip ingerlatsivimmi ineriartortitsinermut pisortatut atorfik pilersinneqaqqammersoq atorfigilissavaa taamaasilluni pisortamik nutaamik atorfinitsitsisoqaraluartoq pisortaqatigiinniiginnassalluni. Atorfimmi nutaami Helene Horsbrughip Meeqanut Ilaqutariinnullu Ataatsimiititaq suleqatigalugu ineriartornissamut pilersaarusiareqataaffigisimasami piviusunngornissaa qulakkiissavaa.
”Ingerlatsiviup pilersinneqarnerani pisortatut sulineq pissanganarlunilu unammillernarsimavoq. Qilanaaraaralu decembarip aallartinneraniit ineriartortitsinermut pilersaarutip piviusunngortinniarnissaanut suleqataanissara”, Ineriartortitsinermut pisortanngortussaq taamak oqarpoq.
Helene Horsbrugh Kommuneqarfik Sermersuumi 2015-imili atorfeqarpoq.