Innuttaasunut

2019-imi Ilungersuussilluartunik toqqaasoqarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuumi borgmesteri innuttaasunut ulluinnarni immikkuullarissumik iliuuseqartartunut, illoqarfimmi, nunaqarfimmi kommunimulluunniit iluaqutaasussamik ataatsimoorussaasumillu iliuuseqartartunut Ukiumi Ilungersuussilluartutut ukiut arfineq-pingajussaa nersorinnippoq

Ukioq manna nersorinninneq Nuummi Kommuneqarfiup Allaffiani Kommunalbestyrelsip ataatsimiittarfiani pivoq, tassanilu nersornaatisisut pingasut taakkulu ikinngutaat ilaqutaallu qaaqqusaallutik.

Nersornaatisinissamut innersuussarpassuit akornanni nersornaatisisussat borgmesteri Charlotte Ludvigsenimit toqqarneqarput, taassumalu diplomissaat akissarsiassaallu tunniuppai.

Nersornaatisisut tassaapput:

Anne-Mette Holm

Kulusummi Nuummilu meeqqat kiisalu inuusuttut tarnimikkut napparsimasut pillugit suliaqarnera.

Anne-Mettep sananermi assassortitsinermilu workshoppertitsisarnermigut meeqqat inuusuttullu oqariartuuteqarnissaanik periarfissittarpai. Assassornermi suliaat kingusinnerusukkut saqqummersinneqaraangata piginnaasaat suliaallu pillugit immikkorluinnaq nersualaarneqartarput.

Anda Poulsen

Angutit oqaloqatigiittarfianik angutit misigissutsiminnik ammasumik annissuiniassammata pilersitsinikuuneranik.

Inuiaqatigiit akornanni angutaalluni misigissutsinik ajornartorsiutinillu eqqartuinissamut ajornakusoortitsiffiusumi Andap “Nuummi Angutit Oqaloqatigiiffiannik” taavalu peqatigiiffik “Nuummi Inngertartut Peqatigiiffiannik” sulinermigut ajornannginnissaa angusinnaasimavaa.

Esekias Therkelsen

Ilaqutariit tarnikkut napparsimasortallit pillugit peqatigiiffimmi siuttuunera pillugu.

Inuit tarnimikkut nappaatillit pillugit paasissutissiisarnermut paquminartuujunnaarnissaanullu kiisalu ilaqutariinni tarnikkut napparsimasortaqarluni qanoq kinguneqarsinnaanersoq innuttaaqatinut ilisimatitsissuteqartarneq kikkunnit tamanit paasineqarsinnaaniassammat Esekip sulinera immikkuullarilluinnaqqissaarpoq. Inuit tarnimikkut napparsimasut pitsaanerusunik atugaqalernissaat Esekip qasujaalluni ilungersuutigisarpaa.   

Nersorinninneq nuannateqatigiilluni ingerlanneqarpoq

Qaaqqusat, ikinngutit ilaquttallu 20-t sinnilaarlugit peqataasut peqatigalugit nersornaatisisut nuannersumik ersaattaanneqarlutillu nersorneqarput.

Akissarsiassamik tunniussinermi borgmesteri Charlotte Ludvigsen oqarpoq ajoraluartumik kommune checkerujussuarnik suuteqanngitsoq akissarsiassalli naqinneri angisuunik allaqqapput. Qularutiginngilaali aningaasartai kontuinut ikineqarumaartut. 

Nipilersortartut Kimmernaq aamma Frederik nipilersuutinik akunniliillattaartullu tusarnaartut tamulugassanik juullisunnitsunik pillattaarput.

Aaqqissuussamit assit ataani takukkit.