Kommuneqarfik Sermersooq Nuummi illoqarfimmi atuarfiit, Nuummi Sulisitsisut aamma CSR Greenland suleqatigiillutik, ukioq manna inuussutissarsiorfiit ilinniarfissallu pillugit, Siunissaqaasa 2024-mut aggersaapput. Aaqqissuussineq ingerlanneqassaaq Atuarfik Inussummi ulloq 2. oktober 2024 nal. 10.00-imit 14.00-ip tungaanut, aggersarneqartut tassaallutik Nuup illoqarfiani atuarfinni 9. aamma 10. klassini atuartut.
Nittarsaassinermi siunertaavoq atuartut siunissami ilinniagariligassaminnut suliffigiligassaminnullu isumassarsiortinnissaat. Suliffeqarfiit ilinniagaqarfiillu suliaminnik saqqummiussinissamut periarfissaqassapput aammalu sungiusarfissanik neqerooruteqarfigalugit, suliffeqarfinnik ilinniakkanillu assigiinngitsunik atuartut siuningaaniit paasisaqarfigisinnaasaannik. Tamanna atuartut siunissartik pillugu paasisaqareerlutik toqqaanissaannut misigisassatut pingaaruteqarsinnaavoq.
Nittarsaassinermi peqataaniaraanni nal. 8.00-imiit suliffeqarfiit atuartunik naapitsinissaminnut piareersimassapput suliffeqarfitsik pillugu aammalu sulisut sunik ilinniagaqarnersut pillugit oqaluttuullugit. Tamatuma saniatigut suliffeqarfiit kaammattorneqarput atuartut suliffimmik misiliinissaannik neqeroorfiginissaannut.
Peqataaniarluni nalunaarnissamut killiliunneqarpoq aggustip 15-iat 2024, peqataaniarluni nalunaarneq uunga nassiunneqassaaq email csr@csr.gl.
Aaqqissuussineq suliffeqarfiit namminneerlutik aningaasatigut tapiiffigaat, kisianni aningaasaliiumasut kikkulluunniit tikilluaqquneqarput, saqqummersitsinermi atuartut sapinngisamik annertuumik pissarsiaqarnissaat qulakkeerniarlugu.
Nuummi ilinniagaqarfissat suliffigiligassallu qanoq amerlatigineri pillugit nittarsaassinissamut peqataajartorit!
Paasisaqarnerorusukkuit ukununnga attaveqarit:
Rena Kriegel Mikkelsen, Kommuneqarfik Sermersooq, rena@sermersooq.gl
Bent Sørensen, Nuummi Sulisitsisut, bent@ga.gl
Ulla Lynge, CSR Greenland, csr@csr.gl
Ullormi isumassarsiorfiusumi ilikkagaqarfiusumilu takunissarsi qilanaaraarput!