Uummateqarfik innuttaasunut atugarliortunut angerlarsimaffeqanngitsunullu ulluinnaat ingerlannissaannut ikiorneqarnissamik pisariaqartitsisunut ikiorsiissutaassaaq. Ininut nutaanut nutsereernerup kingorna uummateqarfik ammaqqippoq, tamatumuuna Prinsessevejimi.
Angerlarsimaffeqanngitsut innuttaasullu atugarliortut ulluinnaat ajornannginnerulersissinnaajumallugit ornittagaq atortunik arlalinnik atukkiisinnaavoq assigiinngitsunillu periarfissaqartitsilluni. Assersuutigalugu iluamik uffartoqarsinnaavoq, errortanik atisassamaateqarpoq, nutsanik killuisoqarsinnaavoq aamma ataatsimut sammisassaqartitsisassaaq.
”Nuannaarutigeqaarput Uummateqarfik ammaqqimmat, aammalu innuttaasut tapersersorneqarnissaminnut pisariaqartitsinerpaajusunut tapersersuinissamut neqerooruteqarsinnaagatta,” Marthannguaq Dahl Bech, kommunip angerlarsimaffeqanngitsuuneq pillugu suliassaqarfiani aamma Aqqusinerni angalaartunut sulianik ataqatigiissaarisoq oqarpoq.
Marthannguaq oqaluttuarpoq: ”Sullitat amerlasuut ullut tamaasa attavigisarpavut, tusarneqarlunili, ininik nutaaqarnera pillugu tamarmiunngitsut ilisimagaat. Taamaattumik piffissami tamatumani sapinngisamik amerlanerpaanut apuussiniarluta immikkut suliniuteqarpugut.”
Ornittagaq ullut tamaasa nalunaaqutaq 09:00-imiit 14:00-ip tungaanut ammasarpoq, najukkami Prinsessevej 2-mi, unnuisarfik Ungaaq illoqatigalugu. Aammattaaq unnuisarfik unnuiffigineqarsinnaavoq, innuttaasut angerlarsimaffeqanngitsut unnuisarfiup unnuiffiginissaanut piumasaqaataasunik malinnissinnaasut pineqarpata.
Iliuusissatut pilersaarutit tapersiinerlu
Uummateqarfiup atortorpassuisa saniatigut innuttaasut ornittakkap sulisui aamma kommunip Aqqusinermi angalaartui attavigisinnaavaat.
Aqqusinermi angalaartut kommunip sulisorivai, tassaallutik angerlarsimaffeqanngitsut ikiorneqarnissaannut taperserneqarnissaannullu periarfissaqarnerat pillugu ilisimatinniarlugit suliniaqqissaarlutik ujartuisuusut.
Uummateqarfimmi Aqqusinermi angalaartut ornittakkallu sulisui ammasarfiit iluanni attavigineqarsinnaajuaannarput, innuttaasullu peqatigalugit iliuusissatut pilersaarusiorsinnaallutik, taamatullu innuttaasut ikorfartorneqarlutik, aqqutissiuunneqarlutik, tapersersorneqarlutik malinnaavigineqarlutillu ingerlaqqissinnaallutik.
Uummateqarfik aamma Aqqusinermi angalaartut Kommuneqarfik Sermersuumi angerlarsimaffeqanngitsunut aamma inuuniarnermikkut ajornartorsiuteqartunut tamakkiisumik isumaginninnikkut sullissinissamut ilaatinneqarput. Matumunnga assersuut alla tassaavoq, angerlarsimaffeqanngitsunut suliffeqartunut misiliummik ineqartitsilluni suliniuteqarneq.
