Innuttaasunit siunnersuutitut aallartittoq maannakkut piviusunngortinneqarpoq. Uumasuutinut iliveqarfik innuttaasut uumasuutiminnik ilisinissaannut periarfissiivoq.
“Suliat kingulliit inissileruttorput, suliassarlu kiserngoruttoq tassaavoq nunataat assannissaa. Suliassaq tamanna qanittukkut neqerooruteqartitsissutigineqassaaq, taamaattumik qaqugu ammarnissaa suli aalajangersinnaanngilarput. Naatsorsuutigaarpulli 2024-mi aasap naanerani ammarnissaa”, Kommuneqarfik Sermersuup sanaartornermi pisortaa Rudi Birkedal oqarpoq.”
Uumasuutinut iliveqarfik Pisissip aamma Ukkusissap sivingarngata akornanni inissisimavoq. Uumasuutinut iliveqarfik uumasunut 100-nut inissaqarpoq, taakkunanngalu siulliit qulit inniminnerneqareerput.
Illoqarfimmik ineriartortitsinermut Sanaartornermullu Ataatsimiititami siulittaasup, Justus Hansenip, innuttaasunit siunnersuutip massakkut piviusunngortinneqarnera assut nuannaarutigivaa: ”Tamanna siullermik innuttaasut oqartussaaqataanerat eqqarsaatigalugu pitsaasumik takutitsisutut isigivara, tassa matumani innuttaasumit siunnersuut innuttaasunik peqataatitsivoq, illoqarfiup ineriartortinneqarnissaa pineqartillugu. Tamanna isumassatsialaat pitsaasut tamarmik piviusunngortinneqarsinnaanerannik uppernarsaasuuvoq.”
Nangippoq: “Nammineerlunga arlaleriarlunga missingersuutinik isumaqatiginninniarnernut atatillugu assingusunik siunnersuuteqartarnikuuvunga, taamaattumik innuttaasup siunnersuutaata piviusunngortinneqarnera nuannaarutigivara,” Justus Hansen oqarpoq.
Tom Amtoft, qimminut nakkutilliisoq, iliveqarfimmi inissanik ilisimasalik oqaluttuarpoq: “Kiisami tassunga killikkatta nuannaarutigivara, uumasuutit siulliit ilisinnaannguliivippagut. Uumasuutinut iliveqarfiup ammarneqarnissaanut sila assut apeqqutaasimavoq. Ukiup issinera annerusumik minnerusumilluunniit qaangiuppoq, taamaalillutalu nuna assassinnaanngorparput. Tamanna aamma siunissami uumasuutinik ilisiniartarnitsinnut apeqqutaasussaavoq, uumasuutit ilineqarsinnaanerat eqqarsaatigalugu, naak inissaqaraluartoq.”
Nangippoq: “Suliniummik tapersersuillutik nukippassuit nammineq piumassutsiminnik atorneqartut assut tupigusuutigivakka. Taakkoqanngippat maani Nuummi uumasuutinut iliveqarfik pilersinneqarsimanavianngikkaluarpoq.”
Uumasuutit qasuersaarfiat Donnas Dyreklinik-imit aqunneqassaaq
Uumasuutigisap ilineqarnissaa kissaatigineqarpat imaluunniit apeqqutissaqartoqarpat, taava Donna Dyreklinik attavigeqquneqarpoq.
Innuttaasutut siunnersuutissaqaruit, politikkikkut suliarineqarnissaanik kissaatigisannik, taava taanna kommuneqarfiga aqqutigalugu tunniussinnaavat. Ataani Kommuneqarfiga-mut siunnersuuteqarfigisinnaasat aamma Donnas Dyreklinik-imut link-it takusinnaavatit, tassani aamma uumasuutinut iliveqarfik annerusumik paasisaqarfigisinnaavat.
