Ittoqqortoormiini atuarfimmi, Ejnar Mikkelsenila Aluarpiani atuartunut nerisitsisarneq iluatsilluarpoq – atuartunuinnaanngitsoq kisiannili aamma illoqarfiup piniartuinut iluaqutaavoq. Nerisitsisarnerup iluatsilluarnerata aamma kinguneraa nerisassanik eqqaasarnerup atorunnaarsimanera.
Borgmesteri Avaaraq Olsen, Aningaasaqarnermut Inuussutissarsiornermullu Ataatsimiititaq, Inoqarfinnut Avatangiisinullu Ataatsimiititaq kiisalu pisortaqatigiit peqatigalugit qaammat maaji naalersoq Ittoqqortoormiinut angalapput. Ittoqqortoormiinilu pissutsit qanimut takusatik nuannersut arlallit misigaat, tassanga ilaalluni atuarfinni nerisitsisarneq.
”Tunumi pissutsit kitaanit pissutsiniit allaaneroqaat, taamaammat maani pissutsinut naleqqussarsimanerat malunnarpoq. Atuarfimmi nerisitsisarneq eqqaaginnarsinnaavarput, nunatta pissarititai assut tassani atorluarneqarput – taamaasilluni piniartut aamma atorluarneqartarlutik. Imminut pilersorneq atorneqarluni,” borgmesteri Avaaraq Olsen oqarpoq.
Nerisassat igiinnarneqartartut annikillinerat
Ejnar Mikkelsenila Aluarpiani pisortaq Jonathan Petersen oqarpoq, atuarfimmi nerisanik eqqaasarneq atorunnaarsimallugu, iginneqartartut tassaaginnalerlutik saanikut.
”2020-mi aallartikkama atuarfitsinni nerisaqartitsisarneq allanngortinniarlugu suliniuteqarpunga. Suleqatikkalu tamanna iluatsilluarsimallugu oqaatigisinnaavara,” Jonathan Petersen unnersiorpoq.
Siornatigut atuarfik qallersoriikkanik atuartunut sassaalliuteqartarsimagaluarpoq, atuartulli ullumikkut nammineerlutik qallersuisinneqartalersimapput, taamaasillutik kajumigisatik qallersuutit toqqarsinnaanngorlugit. Taamatut aaqqiinerup saniatigut aamma iggavimmiut qaammammut madplaniliornermut, elevrådi allaanerulaanik soorlu burger imlt pølsehorn illigisatik piumallugit saaffigin-nissutigisaat akuerineqarlutik peqataatinneqarlutik aaliangeeqataaffiunikuupput Jonathan Petersen oqarpoq.
”Atuartut peqataatilluinnarneqarnerata kinguneraa atuartut kajumigisaat aallaavigalugit nerisitsisarneq, taamaasillutalu ullumikkut angusagut pitsaasut piviusunngortinneqarput,” Jonathan Petersen oqarpoq.
Jonathan Petersen aamma oqarpoq iffiat qaqortut iffiallu atuarfimmi iffiorneqartartut.
Piniartunik suleqateqartarneq
Ejnar Mikkelsenila aluarfiani nerisitsisarnermut aaqqiissut assigiinngitsunik iluaqutitaqarpoq, aaqqiissut aamma piniartunut iluaqutaavoq. Jonathan Petersen oqarpoq piniartunut ”inniminniisarlutik”, piniartullu piniagaannik sinnikunik pisisaratik, taamaaliornikkut anguniarneqarpoq neqit aalajangersimasumik pitsaassuseqarnissaat.
”Ittoqqortoormiini taassumalu eqqaani piniagassat mamartorsuupput, assersuutigalugu umimmaat maani atorluaqaavut. Umimmaat neqaanik kingullermik pisigatta 200 kiilunik pisivugut, neqillu assigiinngitsumik nerisassiarisarpavut – soorlu neqaa aserorteriarlugu pizzaliassatut suliaralugit, taamaattumillu meeqqat mamarilluinnagaannik neriassiorsinnaasarluta,” Jonathan Petersen oqarpoq.
Piniartunut neqinik pisisarnerup saniatigut atuartunik aallaarsimaartitsisarnerminni piniartut atuartunik pinialunnermik inuunerannik ilinniarfigalugi ulluinnarnilu iliuuserisartagaat malinnaaffigineqartarput, angalanermilu pisat aamma atorneqartarput atuarfimmi nerisaqarnermut.
Atortunik nutarterineq
Atuarfiup iggaviani atortut nutarterneqarsimapput aammalu qerititsiviit taarsersorneqarsimallutik. Qerititsiviit nalinginnaasut 12-it siornatigut atorneqartarsimapput, taakkulu containerimik taarserneqarsimapput – atuarfik taamaasilluni qerisunik amerlanerujussuarneq qerititsisinnaanngorpoq.
“Qerititsivissuarput 2023-mi atulerparput, tamatuma kinguneraa neqerpassuarnik pilisinnaanngornerput. Umimmaappata, qilalugaappata, eqaluuppata allalluunniit amerlanerungaartut qeritissinnaanngorpavut. Amerlanernik qerititsisinnaannginnarata kisianni aamma sarfamik atuinerput annikillisipparput,” Jonathan Petersen oqarpoq.
Ejnar Mikkelsenila Aluarpiani nerisitsisarnermut aaqqiissut pitsaasoq maligassaasorlu borgmesteri Avaaraq Olsen isumaqarpoq.
“Kommuneqarfik Sermersuumi piujuartitsineq imminullu pilersorneq pingaartittupilussuuarput. Ejnar Mikkelsenila Aluarpimmi aaqqissuussap takutippaa kommunitsinni sulisut suliniutaat qanoq pingaaruteqartiginersut. Ejnar Mikkelsenila Aluarpiatut ittut maligassiuisuupput nuannaartunartut, atuarfiullu nerisitsisarnermut aaqqiissutaa atuarfimmut iluaqutaaginnarani piniartunut aamma iluaqutaavoq minnerunngitsumillu piujuartitsinerusumik ingerlaaseqarnissatsinnik anguniagaqarnitsinnut sunniuteqarluarluni, soorlu eqqaaginnartarnerit taamaatiinnarnerinik aammalu imminut pilersornerulernermik,” borgmesteri Avaaraq Olsen unnersiorpoq.