Pingasunngormat unnukkut Kommuneqarfik Sermersooq katersortarfimmi tamanut ammasumik innuttaasunik ataatsimiititsivoq, pingaarnertut qulequtaallutik Autisme Spektrum Forstyrrelser inunnut allanut matoqqasuuneq tunuarsimaartuunerlu aamma ADHD, innuttaasut 70-it sinnerlugit takkupput, unnuullu ingerlanerani tunniussaqaqatigiiffiulluartumik nuannersumillu ingerlavoq.
Pikkorissaanermik ingerlatsisuusoq aamma perorsaanermik siunnersortaasoq Heinrich Kipp nappaatinut taakkununnga marluusunut tunngasunik sukumiisumik saqqummiivoq, tusarnaariallu aamma misilittakkanik avitseqataanissaannut apeqquteqarnissamullu periarfissaqartinneqarlutik.
Mathias Knude Brusgaard, kommunimi Innarluutilinnut aamma tarnikkut nappaatilinnut Immikkoortortaqarfimmi fagchefiusoq innuttaasunik ataatsimiititsinermi aaqqissueqataavoq: ”Neriuutigaarput, tamarmik sammineqartunut tunngasunik ilisimasanik nutaanik paasinninnerulernermillu pissarsiaqarsimassasut. Nuummi Innarluutilinnut aamma tarnikkut nappaatilinnut Immikkoortortami sulisut Heinrichip pikkorissaanerani peqataapput, kissaatigaarpullu innuttaasut sinneri aamma periarfissinneqassasut, taamaalillutik nappaatit pineqartut pillugit ilisimasaqarnerulerniassammata. Taannalu pillugu innuttaasunik ataatsimiititsivugut. Unnummi tassani peqataasunut tamanut qujanaq, unnummik nuannersuutitseqataavusi!”
Innarluutilinnut aamma tarnikkut nappaatilinnut Immikkoortortaq sulisunut tamanut pikkorissaanermik assingusumik ukiamut ingerlatseqqissaaq, tassungalu peqatigitillugu innuttaasunik ataatsimiititsinissamut aggersaaqqissaagut. Taamanikkussamut qulequtaassallutik skizofreni aamma atornerluineq, innuttaasunik ataatsimiititsinissaq pingasunngornermi oktobarip 16-ianni katersortarfimmi pissasoq naatsorsuutigineqarpoq. Pisussaq qanilleriarpat paasissutissat annertunerusut saqqummiunneqarumaarput.
Aaqqissuussami tulliuttumi takunissarsi qilanaaraarput!
