Kommune meeraaqqerivinni meeqqerivinnilu sulisunik pisariaqartitsivoq, soraarnerillu iluaqutaasinnaapput. Qullissarmiu Kaalat Olsen Hansen soraarneruvoq ikiuunniarluni aalajangersimasoq. Ukioq kingulleq maajimi soraarninngorsimavoq, ukioq mannalu januaarimi meeqqerivimmi Puiami ullup ilaannaani sulisutut aallartippoq.
”Angerlarsimaannarsinnaannginnama – taamaattumik sulileqqippunga,” Kaalat oqaluttuarpoq. Kaalat ullaakkut 07.00 – 09.00 akornanni aammalu ualikkut 15.00 – 17.00 akornanni sulisarpoq, piffissat meeqqerivinni amigaateqarfiunerpaasut.
Kaalat allallu soraarnerit suliffeqarfeqarnermi suleqataasinnaaneranut peqqutaalluartoq ilaat tassaavoq soraarnerussutisiallit soraarnerussutisiaat ilanngarneqanngikkaluarlutik saniatigut isertitaqarsinnaanerat. Qanoq amerlatigisunik isertitaqarsinnaatitaaneq arlalinnik peqquteqarpoq, qanoq isertitaqartigisinnaanerluni paasiniaanermi kommuni ikiuussinnaavoq.
”Arlallit naluaat soraarnerussutisiamik saniatigut isertitaqarsinnaallutik, soraarnerussutisiaminnik ilanngaatsinngikkaluarlutik. Taamaattumik inissisimanera pillugu oqaluttuarniartunga, soraarnerit allat taamaasillutik periarfissaqarlutik paasiniassammassuk. Utoqqaanerusugut misilittakkanik ulikkaarpugut, taakkulu atorfissaqartinneqarput,” Kaalat nassuiaavoq.
Kaalat Olsen Hansen tamatigoortuuvoq, allaffimmiutut, niuertutut ilaatigullu Piareersarfimmi (ullumikkut Majoriaq) aqqutissiuisutut sulisarsimalluni. Naak perorsaasutut allagartaqanngikkaluarluni inunnik sullitaqarneq misilittagaqarfigaa, siornatigullu uinilu ilaqutariinnut oqilisaassisuusarsimallutik.
Soraarnerit allat imminermisut iliornissaannik kaammattuivoq.
”Meeqqerivimmi sulineq nuannersuuvoq iluarisimaarnarlunilu. Tarnikkut qamuuna pissarsiffiulluartaqaaq, qiimanermik aamma tunisisarami. Amerlasuut nalunngilakka ukiorpassuarni sulereerlutik suliunnaarlutik soraarninngoraangamik “chok”-ertartut. Utoqqaasugut suli atorfissaqartinneqarpugut – amerlasuut iluaqutigisinnaasaannik misilittagaqarpugut.”
Kaalap suliniuteqarnerata soraarninngortut suli inuiaqatigiinnut pingaarutilimmik inissisimanerat takutippaa aamma suliffeqarfeqarneq nalinginnaasoq qimareeraluarlugu. Meeqqerivik Puiami sulilluarnerata takutippaa utoqqaat suli tunniussassanik ulikkaartut aamma meeqqerivinni allanilu paaqqinnittarfinni sulisussaaleqiffiusuni pisariaqartilluinnarneqarlutik.
Soraarneruguit paaqqinnittarfinnilu sulinissannik soqutiginnillutit, Meeqqanut Atuarfeqarnermullu Ingerlatsivik attaveqarfigisinnaavat. Meeqqeriviit attaveqaataat aamma uani nassaarisinnaavatit: https://sermersooq.gl/kl/institutions/
Soraarnerussutisiannik ilanngaatsinngikkaluarlutit saniatigut qanoq amerlatigisunik isertitaqarsinnaanerlutit paasiniaaninni Suliffeqarnermut Isumaginninnermullu Ingerlatsivik ikiuunnissaminut piareeqqavoq. Periarfissatit pillugit uani paasisaqarnerusinnaavutit.