Kommuneqarfik Sermersuumi borgmesterip, Avaaraq Olsen-ip Aningaasaqarnermut Inuussutissarsiornermullu Ataatsimiititaq, Inoqarfinnut Avatangiisinullu Ataatsimiititaq aamma kommunimi pisortaqatigiit sapaatip-akunnera una Ittoqqortoormiineeqatigai. Kommunip suliffeqarfiutaani pulaarput ornigarluarneqartumillu innuttaasunik ataatsimiititsillutik, innuttaasullu illoqarfimmi angallannermut tunngasut annertuumik ajornartorsiutaajuartut eqqaavaat.
Ittoqqortoormiini innuttaasut illoqarfimmi timmisartutigut piginnaasanik amigaateqarlutik misigipput. Ilaatigut pissutaavoq, takornarialerisut allamiut angallatatik Costable Pynt-imut timmisartuussisarnerat, tassanngaaniillu umiarsuarnut angallateqqittarlugit. Tassa imaappoq, najugaqartut timmisartumi inissaqanngillat, billetsillu tunineqartartut Ittoqqortoormiini innuttaasunut iluaqutaanatik.
“Innuttaasut tamanna annertuumik ajornartorsiutitut isigivaat. Uppernarsarsinnaavarpullu Ittoqqortoormiinut billetsisinissaq ajornakusoortuusoq. Illoqarfimmukarniarluta timmisartumik attartoqqaartariaqarpugut,” Avaaraq Olsen oqarpoq.
Ilutigalugu najugaqartut Kitaanukassatillutik Islandi qulaateqqaartariaqartarmassuk naammaginngilaat, piniartullu assartukkat Islandi qulaallugu nassiunneqartariaqarnerat ingammik naammagisimaanngilaat.
Nioqqutissiaat, soorlu umimmaat arferillu Islandi qulaallugu nassiunneqaqqusaanngillat, tassa isumaqarpoq piniartut akissarsiornissaminnut periarfissaat pingaaruteqartoq annaavaat.
“Piniarneq Ittoqqortoormiini namminersornikkut inuussutissarsiornermi periarfissatuaavoq. Taamaattumik piniartunut maanna akornutissiisoqartarnera alianarpoq. Pitsaanerusumik iliuuseqarsinnaasariaqarpugut,” Sermersooq-borgmesteri oqarpoq.
Timmisartuusseriaaseq ullumikkut atuuttoq illoqarfimmi pisiniarfiup nioqqutissanik nutaanik amigaateqartarneranik aamma kinguneqarpoq. Timmisartuussinerit Nuummiit Tasiilakkoortarallarmata, timmisartumi issiaviit marluk Pilersuisumut immikkoortinneqartarsimapput, taakku pisiassanut nutaanut assartuinermut atorneqartarlutik. Taamatut kiffartuussisarneq maannakkut atorunnaarsimavoq.
Avaaraq Olsen-ip innuttaasut naammagittaalliuutaat oqartussaasut susassaqartut ingerlatseqatigiiffiillu peqatigalugit eqqartorniarpai.