Kommuneqarfik Sermersooq meeqqanik inuusuttunillu suliassaqarfimmi peqqinnermik siuarsaanermut pitsaaliuinermullu periusissiamik anguniagaqarfiulluartussamik 2024-mit 2030-mut atuuttussamik aallartitseqqammerpoq. Periusissiaq, Meeqqanut Atuarfeqarnermullu Ingerlatsivimmit suliarineqartoq, meeqqat inuusuttullu atugaannik ineriartornerinillu pitsaanerpaamik piumasaqaateqarnissaanik siunnerfeqarpoq.
Periusissiami immikkoortut sisamat pingaarnerit ukkatarineqarput:
- Eqqarsartaatsikkut peqqissuuneq
- Kinguaassiuutinik atuinikkut misigissutsikkullu peqqissuuneq
- Timikkut peqqissuuneq
- Aanngajaarniutinik atuilernissamut pitsaaliuineq
Ulluunerani paaqqinnittarfinni, atuarfinni klubbinilu ulluinnarni peqqinnermik siuarsaanerup pitsaaliuinerullu ilanngunneqarnissaanik qulakkeerinninnissaq anguniagaavoq, taamaalinikkut Kommuneqarfik Sermersuumi meeqqat inuusuttullu tamarmik inuunerminnik pitsaasumik peqqinnartumillu aallartitsisinnaaniassammata innuttaasutullu alapernaatsutut, tatituutut nuannaartutullu ineriartorlutik.
“Meerartatsinnut inuusuttortatsinnullu toqqissisimanartunik peqqinnartunillu najoqqutasseerusuppugut, avatangiisimi atugarissaarnissaannik peqqissuunissaannillu siuarsaaffiusumi peroriartorsinnaaniassammata,” Poul Petersen, Meeqqanut Atuarfeqarnermullu Ataatsimiititami siulittaasoq oqarpoq.
Periusissiami siusissukkut iliuuseqartarneq aamma suliniutit peqqinnissamik siuarsaaffiusut pitsaaliuiffiusullu paasissutissat atorlugit siunnerfilerneqartarnissaat annertuumik pingaartinneqarput. Suliassaqarfiit immikkoortullu assigiinngitsut akornanni suleqatigiinneq inersimasunillu meeqqanut ullut tamaasa attaveqartartunik peqataatitsinissaq periusissiamittaaq pingaartinneqarpoq.
”Periusissiaq una atorlugu peqqinnermut tunngatillugu naligiinngittoqarnera annikillilerusupparput kiisalu meeqqat inuusuttullu tamarmik peqqinnartumik pitsaasumillu inuuneqarnissaminnik pitsaanerpaanik periarfissinneqarnissaannik qulakkeerinnikkusulluta,” Avaaraq Olsen naggasiivoq.