Kommuneqarfik Sermersuumi piujuartitsisumik pisiniarnermi politikki nutaaq akuersissutigineqarpoq. Politikki nutaaq, Kommunalbestyrelsesip ulloq maajip 15-ani 2024 akuersissutigineqartoq kommunimut pisussaaffiliivoq; kommunip nioqqutissanik aamma kiffartuussinernik sunilluunniit pisinerani piujuartitsineq aamma peqqissaartuuneq ilanngutsinneqartassasut.
“Pisiniarnermi aamma neqeroortitsinermi politikki nutaaq aqqutigalugu qulakkiissavarput, koruunit ataatsit atorneqartut tamarmik ataatsimoorluta siunissatsinnut aningaasaliissutitut atorneqarnerat. Aningaasaqarneq kisimi pineqanngilaq, aamma nioqqutissat pilersinneqarneranni silap pissusianut, avatangiisinut aamma inooqatigiinnermi atugassarititaasunut tunngasut pineqarput uagut akisussaaqataaffigalugit eqqarsaatigineqartarnissaat”, borgmester Avaaraq Olsen oqarpoq.
Politikki suliniutinik imaqarpoq, tunisassiat avatangiisinut uloriananngitsut pingaartinnissaannut, aamma pisiniartarfiit avatangiisinut akisussaassuseqarnermik erseqqissumik takutitsinissaannut tunngasunik. Kommunip neqeroortitsinernik nalilersuinerani ilaatigut nioqqutissat piffissami sivisunerusumi atorneqarsinnaasut aamma avatangiisinut naviananngitsuunerarlugit allagartalikkat pingaartinneqarnerusalissapput.
Imminut akilersinnaaneq kommunip pisiniarnermik ingerlatsinerani aamma qitiusutut eqqarsaatigineqassaaq, nukissat piffissami sivisunerpaami atorneqarsinnaatillugit aamma nutaanik pisiniarneq pilersinnagu eqqarsaqqaartarnissaq. Taamatut periuseqarneq Naalagaaffiit Peqatigiit Nunarsuarmioqatigiinnut anguniagaanik 17-iusunik tapersersuinerinnaanngilaq, aammali pinngortitamut, silap pissusianut kiisalu kinguaariinnut tulliuttunut ataqqinninnermik pilersitsineq siunertaavoq.
“Akileraarutinit aningaasaativut sapinngisamik isumatunerpaamik atornissaat kissaatigaarput, tamatuma nassataraa ineriartortuarnissaq aamma nioqqutissanik tuniniaaviup imminut akilersinnaanerusumik ingerlanissaanut sunniinissamik anguniagaqarneq. Kommuneqarfik Sermersuumi nalinginnaasumik imminut akilersinnaasumik ingerlatsinerup pingaartinneqarnera politikkimi nutaami aamma erseqqissuussaaq, periarfissaatillugu najukkami pisiniarnermik ingerlatsisarneq pingaartinneqartussat ilagissavaat” Avaaraq Olsen, oqarpoq.