Ulluni kingullerni Nuummi issiavinnik, nerrivinnik oqquisarfinnillu annertuumik aserorterinerit nalunaarutigineqarput immikkoortuni ataatsimoorfiusunut akornusiisunit ajornerulersitsisunillu.
Kommunip innuttaasut tamaasa kajumissaarpai sumiiffiit ataatsimoorfiusut akisussaaffigeqqullugit ataqqeqqullugillu. Kommune assinik arlalinnik tigusaqaqqammerpoq aserorterneqarsimasunik takussutissartalinnik. Ilaatigut illoqarfiup oqquisarfiini graffitit eqqagassallu qimaannakkat kiisalu nerriviit issiaviillu sequminnikut pineqarput.
Aalisarnermut ingerlatsinermullu immikkoortumi aqutsisoq, Agnes Olsen oqarpoq: ”Illoqarfimmi innuttaasut kajumissaarpagut mianersuusseqqullugit. Illoqarfiup innuttaasui amerlasuut aasaanerani sulinngiffeqarput tamannalu isumaqarpoq piffissami tamatumani immikkoortut ataatsimoorfiit annertunerusumik atorneqartut. Kikkut tamarmik umiatsiaqanngillat taakkununngalu ataatsimoorfiusut aasaanerani sulinngiffeqarnermi pingaaruteqarput.”
Ulluni tulliuttuni kommunip aserorterineq eqqumaffigineruniarpaa. Tamatta ataatsimoorfiusut ataqqillugillu akisussaaffigitigit TAMATSINNUT iluaqutissaasumik nuannaarutaasussamillu.
