Nunat Avannarliit Nuummi kulturisioqatigiinnerat tallimassaaneerluni sapaatip akunnerani kingullermi ingerlanneqartoq orniguttuni akiliillutik isertut 1200-t aaqqissuussanilu akeqanngitsumik iserfiusinnaasuni 2500-t sinneqartut oqartariaqarpugut ornigarneqarluarsimasut. Billetinik tunisineq siorna tunisanut sanillersuunneqarsinnaapput, aaqqissuussalli ataasiakkaat aatsaat taama ornigarneqarluartigaat.
”Ataatsimut isigalugu aaqqissuussat tamarmik ornigarneqarluarput isiginnaartitsinerillu ilaannut ornigukkaluartut ilaat inissaqanngimmata isertinngitsoortariaqarsimavagut, taamaattumik tapersersuisut eqqarsaatigalugit naammagisimaarinnilluaqaagut”, kulturisiortitsinermi aqutsisuusoq Jonas Nilsson oqarpoq.
Nunat Avannarliit Nuummi kulturisioqatigiinnerat 2021-miilli najoqqutartik naleqqussarpaat, kalaallit kulturiannut samminerulersillugu. Kulturisiortitsinermi aqutsisuusoq isumaqarpoq, orniguttoqarluarneranut tamanna patsisaaqataasoq.
”Kulturisiortitsinermi qitiutinneqartoq nunat avannarliit kulturisioqatigiinnerat allanngortillugu nunani issittuni kulturip aamma nunat avannarliit kulturiat ataqatigiilersinneqarnerat qitiutilernikuuarput. Qularutissaanngitsumillu maluginiarnarpoq, kalaallit nunanilu issittormiut kulturii qitiutinneqalernerat orniguttunit nuannarineqarluartoq”, Jonas Nilsson oqarpoq.
Ukiup affaata missaa qaangiuppat Nunat Avannarliit Nuummi kulturisioqatigiinnerat 2025 pilersaarusiorlugu aallartisarluassaagut, uanilu kulturisiortitsinermi misilittagaasoq atorluarneqassaaq.
”Immaqalu nunani issittuni kulturisiortitsinermut samminerutillugu. Kulturisiortitsinerup illoqarfimmiunut nunanilu tamalaanit aggertunut soqutiginartuunissaa pingaartipparput.”, Jonas Nilsson oqarpoq.
Taamaattorli Nunat Avannarliit Nuummi kulturisioqatigiinnerat suli naammassineqanngilaq. Arfininngornermi ullaap tungaani Qinngutsinni ilaqutariinnut silami aaqqissuussaq pisussaagaluarpoq. Arfininngornermili sila pissutaalluni aasap ingerlanerani pisussanngorlugu kinguartinneqarnikuuvoq.
