Meeqqat atuarfianni angajullerni atuartut inuttut inerikkiartornermi tiimii qanoq annertutigippat

Kommuneqarfik sermersuumi Atuarfinni angajullerni (Trin 3) inuttut inerikkiartornermi tiimit qanoq annertutigippat?

Asasarput Dorthe-Marie Mogensen-Fontain

Apeqqummut akissut:

Ukiut tamaasa Atuarfeqarnermut Immikkoortortaq atuarfinnut ataasiakkaanut ilinniartitsineq pisariaqartitsineq pillugu misissueqqissaarneq nassiunneqartarpoq, una naapertorlugu:

”Atuarfik pillugu Inatsisartut inatsisissaattut siunnersuut nr. 15, 3. december 2012-imeersoq

                                            Atuartitsinerup sivisussusia

• 7. Piffissaq atuartut atuartinneqarfissaat tiimit atuartitsiffiusut 60 minutsikkaartut tunngavigalugit ukiumoortumik naatsorsorneqartassaaq.

Imm. 2.  Nukarlerni ukiuni atuartitsiffiusuni 3-ni tamani atuartut ukiumut minnerpaamik nalunaaquttap-akunnerini 700-ni atuartinneqartassapput. Akullerni atuartut ukiut atuartitsiffiusut 4-anni minnerpaamik nalunaaquttap-akunnerini 890-ini, ukiut atuartitsiffiusut 5-aanni minnerpaamik nalunaaquttap-akunnerini 920-ni, ukiullu atuartitsiffiusut 6-anni 7-annilu minnerpaamik nalunaaquttap-akunnerini 970-ini atuartinneqartassapput.  Angajullerni atuartut pinngitsoorani atuartitsissutini, ukiut atuartitsiffiusut 8-anni, minnerpaamik nalunaaquttap-akunnerini 880-ini, ukiut atuartitsiffiusut 9-anni minnerpaamik nalunaaquttap-akunnerini 910-ni kiisalu ukiut atuartitsiffiusut 10-anni minnerpaamik nalunaaquttap-akunnerini 920-ni atuartinneqartassapput.

Imm. 3. Imm. 2-mi aalajangersakkat sanioqqunneqarsinnaapput, atuartut ingerlaqatigiinni (holdimi) amerlassusaasa pisariaqartippassuk.

Imm. 4. Sapinngisaq naapertorlugu piffissap atuartut atuartinneqartarfissaata, ukiup atuarfiusup sapaatip-akunneranut sapaatip-akunneratalu ulluinut oqimaaqatigiissumik agguataarneqartarnissaa anguniarneqassaaq, tak. § 8, imm. 1-3.”

Inatsit malillugu klassini ukioqatigiiaani tamani atuartitsinerup sivisussusaata minnerpaaffia qulaani allaqqavoq. Tassa ima paasineqassaaq ass. 8. klassimi atuartut faagini tamani minnerpaamik nalunaaquttap-akunnerini 890-ini  atuartinneqassapput meeqqat atuarfiat pillugu inatsit naapertorlugu;

Angajullerni atuartitsineq

• 13. Angajullerni atuartitsissutit ukuupput:

1) oqaatsit tassaasut kalaallit, qallunaat tuluillu oqaasii aamma toqqakkatut allamiut oqaasiisa pingajui,

2) kulturi inuiaqatigiillu tassaasut inuiaqatigiilerineq aamma upperisalerineq isumalioqqissaarnerlu,

3) matematikki pinngortitarlu tassaasut matematikki pinngortitalerinerlu,

4) inuttut inerikkiartorneq, kiisalu

5) sumiiffinni ataasiakkaani toqqagassat.

Imm. 2.  Pinngortitalerinermik atuartitsinermi, tak. imm. 1, nr. 3, immikkut atuartitsissutaassapput fysik/kemi, uumassuseqartulerineq aammalu pinngortitaleriffiusumik nunalerutit.

Imm. 3.  Atuartut angajullerni atuartut siunnersorneqassapput ilinniagaqarnissamut suliffissatullu qinigassat pillugit.

Tassa faagini qulaani allaaserineqartuni atuartut atuartinneqassapput.

Ilinniartitsisunik pisariaqartitsinerup misissuiffigeqqissaarnerata saniatigut atuarfeqarnermut immikkoortortaq meeqqat atuarfiannut inatsimmit tiimit agguataarnerannut pilersaarummut assersuusiamik nassiussipput ilanngussaq 1 takuuk.

Tassani takuneqarsinnaavoq, faagi inuttut inerikkiartorneq 8., 9. aamma 10. klassini akunnernut 30-nut agguataarneqartoq, tamanna sapaatip akunneranut lektionimut ataatsimut naleqquppoq.

Tiiminut faaginik agguataarinermi pilersaarut siunnerfilimmik atortuuvoq, taamaalilluni qulakkeerneqassammat atuartut faagini tamani atuartinneqarsinnaanissaat, inatsimmi allaqqasutut.

Faaginut ataasiakkaanut tiimit amerlassusaat Atuarfimmi siulersuisut aqqutigalugit allanngortinneqarsinnaavoq. Taamaattoq eqqumaffigineqassaaq, faagimi “Inuttut inerikkiartorneq”-mi lektioninik immikkut agguataarinermi faagini allani lektioninik tigusisoqarsinnaanera.

Inussiarnersumik inuulluaqqusilluta

Paarma Søvndahl

Atuarfinnut siunnersorti

Atuarfimmi Immikkoortortaqarfik, Meeqqanut Atuarfeqarnermullu Ingerlatsivik