Kommuneqarfik Sermersuumi pinngortitaq avatangiisillu eqqarsaatiginissaat kissaatigivarput. Ikioqatigiikkuttali illoqarfik pinngortitarlu eqqiluitsuutinnissaat angusinnaavarput. Aputaaruteriarpat takusinnaalissavarput illoqarfimmi pinngortitamilu qanoq eqqagassaqartiginitta eqqaasissavaatigut.
Naak eqqarsaatigineq ajoraluaripput pinngortitami maangaannaq igitat qimaannakkat inunnut pinngortitamullu kinguneri pitsaasuunngillat. Igitani qimaannakkani ajornerpaaq tassaavoq plastikki, ukiorpassuit qaangiunnerini aatsaat arroriartortartoq. Aammattaaq plastikki arroriartuleraangami mikroplastinngortarpoq, imaanut ingerlaqqilluni, naggataagut uagut nerisassatsinnut akulerulluni. Aamma taamaappoq assersuutigalugu cigaretsikut, sikut puukui tyggegummillu ilai. Tamakku kingunerisarpaattaaq eqqakkat uumasunut ajoqutaalernerat, ilaatigut uumasut toqussutigisagaat.
Eqqagarpassuit isiginngitsuugassaanngillat. Sanarfinermut Avatangiisinullu Immikkoortortami aqutsisup, Jakob Kofod, illoqarfimmi pinngortitamilu eqqagarpassuit isigisani iluarinngilai. ”Nuanniigeqaara takugaangakku inuit cigaritsikutik nunamut igiinnaraat, cigaretsikoq issittumi ukiut 5-8 akornanni arroriartortarpoq. Mikroplasti, naggataagut nerisassatsinni akuulersinnaavoq.”, Jakob Kofod oqarpoq.
Kommunimit neriuutigineqarpoq eqqakkat pinngortitamut kingunerisartagai pillugit qaammarsaanerunikkut ajornartorsiut nungusarneqarsinnaasoq. Taamaattumik Jakob Kofod neriuuteqarpoq innuttaasut maangaannaq igitsilertinnatik eqqarsaqqaalaartarumaartut. ”Neriuutigaara innuttaasut Nuummi eqqaaviit arsakoorfiillu amerlasuut qulliit napasuinut nivinngarsukkat atortarumaaraat.”, Jakob Kofod oqarpoq. Taamaattumik Kommunimit kajumissaarutigineqarpoq immitsinnut eqqaasittaqqulluta igitassat pinngortitamut iginnagit, eqqaavimmulli igikkaangatsigit allanngueqataasinnaasugut.