Kommune ataatsimut isiginnittumik isumaginninnikkullu iliuuseqarnikkut angerlarsimaffeqanngitsunik ikilisaaniarpoq. Namminersorlutik Oqartussat kommunillu akunnerminni isumaqatigiissuteqarlutik ukiuni pingasuni misiligummik Nuummi angerlarsimaffeqanngitsut inigigallagassaannik qulakkeeriniarput.
Suliniummut atatillugu inissiaatileqatigiiffik INI inissianik arlalinnik atugassiiniarpoq, taakkulu pilersaarut naapertorlugu innuttaasunit 11-nit najugarineqassapput. Suliffeqarnermut Isumaginninnermullu ingerlatsivimmit Aqqusinermi ujartuilluni angalaartartunit inissianut innersuussassat tulleriiaarneqartassapput aammalu suliatigut ilisimasalinnit, ataavartumik initaarnissap tungaanut pisariaqassappat angerlarsimaffimmik attassinissamut kaammattuisoqarsinnaalluni.
Suliffeqarnermut Isumaginninnermullu Ataatsimiititami siulittaasoq – Inge Olsvig Brandt ima oqaaseqarpoq: ”Pilersaarutaavoq uani Namminersorlutik Oqartussat, inissiaatileqatigiiffik INI kommunilu suleqatigiillutik innuttaasut aalaakkaasumik inuuneqarnissap angerlarsimaffeqanngitsuunerullu akornanniittut ikiorsissallugit. Innuttaasut taakkua ikiorsinnaagutsigit, nutaamik inuuneqalernissaannut tunniusseqataasinnaavugut. Taakkununnga inuiaqatigiinnullu taama pisussaaffeqarpugut.”
Misiligutip ilagaa innuttaasut tulleriissaarinermi innersuunneqartut aallaaviatigut inigigallakkaminni qaammatini arfinilinni najugaqarallarnissaat, piareerunillu ataavartumik inissaminnut nuunnissaat. Tapertaliullugu INI aningaasaqarnikkut siunnersorteqartitsissaaq, aningaasaqarnerup nammineq paasisimasaqarfigilernissaanut ikiuuttussanik.
Suliffeqarnermut Isumaginninnermullu Ataatsimiititami siulittaasoq – Inge Olsvig Brandt ilanngullugu ima oqaaseqarpoq: ”Alloriarneq siulleq tassaassaaq inuit ataasiakkaat upperinissaat. Innuttaasoq upperigutsigu angusassatta affaa angoriissavarput. Suliniummi inuit ataasiakkaat tatiginissaat upperinissaallu pingaartinneqarpoq. Soorunami inissaqarneq pingaaruteqarpoq, inuiaqatigiinnili amerlasuut ikiussagutsigit ataatsimut isiginnittumik aaqqiissutissaqartariaqarpugut, angerlarsimaffeqanngitsut amerlavallaat ikilisarniarlugit aaqqiissuteqassagutta. Kinaagaluaruttaluunniit inuiaqatigiinni pingaarutilimmik naleqartumillu atorfissaqartinneqarpugut.”
Misiligutaasumik suliniummi inissanik atugassiisoqaraluartoq naatsorsuutigineqarpoq qaammatit tamaasa aalajangersimasumik appasissumillu akiliisoqartarnissaa, tassani siunertaalluni angerlarsimaffeqanngitsut aalajangersimasumik akiliisarnissamut sungiussitinnissaat. Imaappoq, suliniummi pineqaannanngilaq angerlarsimaffeqanngitsut najugassaqartinnissaat, aalaakkaanerusumilli inuuneqarnissaannut ikiorsernissaat pineqarluni. Ikiorsiineq suliniutinik assigiinngitsunik imaqarpoq, ataatsimulli isigalugu innuttaasoq pitsaanerusumik atugassaqartikkumallugu, siunissami pisortanit akuliuffigineqarnani nammineerluni inuuneqaqqullugu.