Atuarfik Ukaliusami, Atuarfik Samuel Kleinschmidtimi, Illumi aamma Narsarmiutami sulisut suliffeqarfimmik kattutsinneqarnissaannut piareersarlutik ingerlapput. Ulloq kattuffissaq pillugu ulloq 14. januaari 2023-mi naapeqatigiittoqaqqippoq, tamatumuuna “atuartut kattussuutsinneqarnissaat” qulequtarineqarpoq.
Pilersaarutit malillugit atuarfik 2024-mi atorneqarnissaminut piareerpat, atuartut Nuup qeqqani illumi nutaaliami toqqissisimanartumilu atuarfeqalissapput. Tamannali pitinnagu perorsaanermi tunngavissat inisseqqaarneqassapput, taamaattumillu Meeqqanut Atuarfeqarnermullu Ingerlatsivik ASK-imi aamma USK-imi kiisalu atuareernerup kingornatigut ornittakkani Illu-mi aamma Narsarmiutami sulisut kattunnissaq pillugu ulloqartitsisarpoq.
Atuartut atugarissaarnissaat assut pingaartinneqarpoq.
Kattunnissaq pillugu kingullermik Hotel Hans Egede-mi ulloqartitsisoqarpoq ulloq 14. januaari, tassanilu atuartut kattutsinneqarnissaat sammineqarpoq. Kattunnissaq pillugu ulloqartitsinermi ilaatigut atuartut katitigaanissaasa pilersaarusiorneqarnissaa sammineqarpoq, atuartut atuarfimmi nutaami aallartinnginnerminni imminnut ilisareqatigiinnissaat periarfissaqartikkumallugu. Pingaartumik atuartut atugarissaarnissaat sammisaqarnermi inituvoq.
”Peqataasut akornanni assut piumassuseqarluartoqarpoq, taakkunanit ilaatigut naleqartitat soorlu inissaqartitsineq, ataatsimoorneq aamma akuersaartumik pissuseqarneq tunngavigalugit atuartut ataatsimut sammisaqaqatigiissinneqarsinnaaneri pilersaarusiorlugit ingerlanneqarput. Sapaatip akunnikkuutaartumik ataatsimoorussamik immikkut sammisaqartitsisarnermut periarfissaq, allaqatigiittarnermik aaqqissuussaq allallu klassit assigiinngitsut ukioqatigiiaallu assigiinngitsut ataatsimoortillugit aaqqissuussinerit aamma eqqartorneqarput”, Meeqqanut Atuarfeqarnermullu Ingerlatsivimmi ineriartortitsinermut pisortaq Jill Raarup Hellesen oqarpoq.
Nangilluni oqarpoq: ”Atuarfiup nutaap atorluarneqarnissaa anguneqassappat, taava sulinitsinni atuartut aallaqqaataaniit eqqarsaatigineqarnissaat pingaaruteqarluinnartuuvoq. Taamaattumik atuartut klassini assigiinngitsuni atuartut minnerunngitsumillu sulisut ataatsimooqatigiinnissaat alloriarfissaavoq siulleq.”
Immikkut atuartitsisarnermi siunnersuisut aamma immikkut atuartinneqartuni klasselærerit ulloq ilaatigut eqimattanngorlutik suliaqarfigivaat atuarfeqarnermut ingerlatsivimmit peqataaffigineqartumik. Tassani immikkut atuartitsisarnermi pilersaarusiorneq alloriarfigineqarpoq, suliassaqarfiup allatut ingerlanneqarnissaa pisariaqarmat, atuartullu pisariaqartitaasa allaanera eqqumaffigalugu eqqarsaatigineqartussaammat.
Nutaamik eqqarsarluni atuarfik nutaaq atuartitsiviussaaq aamma sulinerup nuannersuuneranik pitsaanerulersitsilluni
Atuarfissami atortut nutaaliat allatut atuartitsinissamut periarfissiilluarput tamannalu atorluarneqassaaq. Taamaattumik isumassarsiat misilittakkallu paarlaasseqatigiiffiussapput, pilersaarusiornermut suleqatigiinnermullu pitsanngorsaataasussat:
”Isumaqarpugut ingerlalluartoq, qumajasuutigivarpullu suliffeqarfinni sisamani sulisut taama annertutigisumik pimoorussitigimmata. Pingaartumik sulisut suleqatissatillu imminnut tigulluartiginerat takullugu assut nuannersuuvoq, imminnut ilisareqatigiinnissaminnik iliuuseqartut. Imminnut ataqqeqatigiilluarnerat ersarippoq.” Taama oqaaseqarpoq atuarfeqarnermi fagchefi Riikki Grønvold.
Ullut kattunneq pillugu sammisaqaqatigiiffiusut tullii ulluni marsip 7-iani aamma maajip 2-ni pinissaat pilersaarutaavoq.