Kulturitta siuarsarneqarnissaa pillugu Siunnersuisoqatigiit Aningaasaateqarfik Sermeq aqqutigalugu aningaasanik agguaavoq. Aningaasaateqarfiup kulturimut tunngasut uummarissassavai kommunilu ataatsimoortillugu.
Aningaasaateqarfik Sermeq ukiumi aappassaanik agguaassigami, katillugit 700.000 koruunit sinnilaarlugit nalilinnut suliniutinut arfineq-marlunnut agguaassivoq, tamannalu aningaasaliineruvoq, borgmesterip Avaaraq Olsenip, aamma Kulturitta siuarsarneqarnissaa pillugu Siunnersuisoqatigiinni siulittaasuusup, nuannaarutigeqisaanik.
”Maannakkut suliniutinut arlalinnut nutaaliortunut inuiaqatigiinnullu attuumassuteqartunut tapiissuteqarpugut, tamannalu nuannaarutaallunilu oqallinnermik pilersitsissaaq. Suliniutinut taamaattunut Aningaasaateqarfik Sermip tapiissuteqartarnera pingaaruteqarpoq, taamaaliornikkullu siornatigut misiginikuunngisatsinnik kulturikkut tunineqartarpugut. Suliniutit naammassippata takunissai qilanaaraakka”, Avaaraq Olsen oqarpoq.
Maannakkut qinnuteqaateqartut arfineq-marluk assigiinngitsut namminneq suliniutiminnut, assigiinngitsorujussuarnut, taperneqarput.
| Qinnuteqaateqartoq | Pilersaarut |
| Christoffer Stenbakken, Alberte Parnuuna, Carl Taunajik Florian Sørensen | Tasiilami inuusuttut inuusuttuaqqallu suleqatigalugit professionalimik piviusuusaartitamik nangeqattaartuliornissaq. |
| Niviaq Korneliussen, Maliina Abelsen, Bilo Høegh Stidsen | “45” Qulliit atorlugit imminut toquttarneq eqqumaffigineqarnissaa siunertaralugu aaqqissuussaq. |
| Sermersuumi Nipilersornermik Ilinniarfik | Guitarertartoq Mikkel Andersen peqatigalugu workshopertitsineq. |
| Innutaasut Illuat Illorput | The Invisible Robber – sapaatip-akunnerini arfinilinni meeqqanut 8-12-nik ukiulinnut tuluttut oqaaseqarluni isiginnaagassiorneq, taannalu inaarutaasumik ilaquttanit ikinngutinillu isiginnaarneqarsinnaassaaq. |
| Susanne Andreassen | Oqaluttualimik HOMO sapiennemik isiginnaagassiorneq. |
| Naleraq Eugenius | Suliniut Aakkiartulerpoq – Meltification. Aaqqissuussami sermersuup aakkiartornerata nipaa qanorlu isikkoqarnera sammineqassapput. |
| Hanne Saandvig Immanuelsen | Nunatta Agiartartoqatigiivini ilaasortanut juullimut tunngatillugu suliniuteqarneq, marloriarluni tusarnaartitsinikkut juullimilu isiginnaartitsinikkut. |