Kommuneqarfik Sermersuup kommunalbestyrelsiani partiit suleqatigiit, IA aamma Naleraq; 2023-mut missingersuutit pillugit isumaqatigiissuteqarput. Akileraarut allanngussanngilaq aamma meeqqanut utoqqarnullu aningaasaliissutit amerlanerussapput.
Kommuneqarfik Sermersuumi atugarissaarneq kiffartuussinerlu nukittorsaaffigineqassapput, tamatumalu peqatigisaanik annertusaanissaq ineriartortitsinissarlu inissaqartinneqassapput. Missingersuummi, Kommuneqarfik Sermersuup kommunalbestyrelsiani partiit suleqatigiit atsioqqammisaanni tamakku anguniagaapput.
Ukiuni tulliuttuni partiit isumaqatigiissut kommunip suliassaqarfiini pingaarnerni kiffartuussinerup nukittorsarneqarnissaata aallunneqarluarnissaa kissaatigaat; meeqqanik paaqqinninneq, meeqqat atuarfiat utoqqarnillu isumassuineq. Missingersuutini 4 millioner koruunit utoqqarnik puigortunngorsimasunullu immikkut ittumik suliniuteqarnissamut immikkoortinneqarput, taammalu meeqqat ajornartorsiortut ikiorserneqartarnerinik nukittorsaaniarluni aningaasaliissutit 4 millioner koruuninik ilaneqarput.
Perorsaasunik ilinniartitsisunillu ilinniarsimasunik atorfinitsitsinissamut isumalluutit amerlanerusut atorneqassapput, aammalu ulluunerani paaqqinnittarfinni sulisut ilinniarsimanngitsut piginnaanngorsarneqarnissaannut aningaasanik immikkoortitsisoqarpoq. Tamatuma saniatigut perorsaasunut orniguttartunut aaqqissuussinermut, kommunip ulluunerani paaqqinnittarfiini suliassat perorsaanermut tunngasut pitsaanerulersinneqarnissaannik qulakkeeriffiusussamut 6 millioner koruunit immikkoortinneqarput.
Missingersuutini meeqqanut pensionistinullu bussinut bilitsit akeerutsinneqarnissaannut 6 millioner koruunit immikkoortinneqarput, aammalu kommunimi peqatigiiffinnut tapiissutit amerlisinniarlugit 7 millioner koruunit immikkoortinneqarput.
Ukiuni kingullerni Kommuneqarfik Sermersooq sanaartugassanut amerlasuunut aningaasaliingaatsiartarsimavoq. Partiit isumaqatigiissut kommunimi innuttaasunut atugassaritaasunik pitsaanerusunik pilersitsisarnerup ingerlaannarnissaat, tamatumalu peqatigisaanik aningaasaqarnikkut siuariartornerup ingerlaannarnissaa kissaatigaat. Taamaattumik kommunimi sanaartorneq suli annertuvoq. Nuup illoqarfiata qeqqani atuarfiup, ulluunerani paaqqinnittarfiup aamma AKO-p inaarsarneqarneri ingerlateqqinneqassaaq. Tamatuma peqatigisaanik Paamiuni Tasiilamilu inissialiortiternermut aningaasanik immikkoortitsisoqarpoq. Paamiuni eqqakkanik tigooqqaaviup sananeqarnera aallartinneqassaaq, aammalu Tasiilami utoqqaat angerlarsimaffiannik nutaamik sananissamut misissueqqaarnerit aallartinneqassapput.
Ittoqqortoormiini aqqusernit betonit nutaat sananeqassapput, utoqqarnullu ataatsimut sullissiffissamut nutaamut misissueqqaartoqassaaq.
Nuummi Siorarsiorfiup tungaanut sullorsualiassamut, aammalu Nuup Nuussuullu akornanni sullorsuup allineqarnissaanut misissueqqaarnerit aallartinneqassapput. Misissueqqaarnerit marluusut taakku aatsaat 2027-mi ingerlanneqartussaagaluarput. Aamma Nuup Qinngorpullu akornanni angallannermi pissutsit pitsaanerulersinneqarnissaannut aammalu angerlarsimaffeqanngitsunut sullissivimmut nutaamut misissueqqaarnernut aningaasanik immikkoortitsisoqarpoq.
Partiit isumaqatigiissut innuttaasunut inissianik amerlanerusunik pissarsinissamik suli kissaateqarput, taamaattumillu 2023-mut 115 millioner koruunit nammineerluni inissialiortiternissamut immikkoortinneqarput.
Aamma partiit isumaqatigiissut isumaqatigiissutigaat, Nuup mittarfiup nutaap 2024-mi ammarnissaanut piareersartinneqarnissaa qulakkeerniarlugu suliniuteqartoqassasoq. Suliniut taanna takornariartitsisartut inuussutissarsiutinillu ingerlataqartut suleqatigalugit, aammalu illoqarfimmi innuttaasut tamaasa akuutillugit ingerlanneqassaaq.
Missingersuutit Kommuneqarfik Sermersuup 2023-mi siumut eqqortumik ingerlanissaanut periarfissiisut partiit isumaqatigiissut isumaqatigiissutigaat.
”Missingersuutinik innuttaasunik salliutitsiffiusunik suliaqarpugut. Meeraq ilaqutariillu ajornartorsiortut pilertortumik piffissarlu eqqorlugu ikiorserneqartassapput, toqqissisimalluni qitornamik meeqqerivimmut tunniussisoqartassaaq, kiffartuussinerni assigiinngitsuni piffissat suliaqarfiusartut misissoqqissaarneqassapput, aammalu sunngiffimmi sammisaqartitsinerni innuttaasunut neqeroorutit amerlanerulernissaat qulakkeerneqassaaq”, borgmester Avaaraq Olsen oqarpoq.
”Siammasissumik suliniuteqarnissaq aalluttussanngoratsigu nuannaarutigaara. Pingaartumillu innarluutilinnut ataasiinnarmik saaffiginnittarfeqalernissatsinnik ineriartortitsiniarluta aalajangiinerput nuannaarutigilluinnarpara, taamaalilluni innuttaasut eqqarsaatigilluakkamik pitsaasumillu kiffartuunneqarnermik misigisalissammata. Kommunimut saaffiginninnissaq ikiortissarsiornissarlu ajornaatsuussaaq”, Inuit Ataqatigiinniit suleqatigiinnut siulittaasoq Inge Olsvig Brandt oqarpoq.
“Nuannaarutigaara kommunitsinni suleqatigiit iluanni siammasissumik suliniuteqaratta, taamaasillutalu suleqatigiinnerput ineriartorfiulluassasoq qularutissaanngilaq. Kommunerput isorartugaluaqisoq aporfiginagu peqatigiissumik pingaarnersiuilluarnermillu siunissamut isigisumik ineriartornissaq pisariaqarpoq. Massakkullu 2023-mut missingersuutissarput inoqarfiit tamaasa ineriartornissaanut tikkuussisuuvoq. Qularnanngitsumillu timitalimmik ineriartuutaassalluni”, Naleqqamiit suleqatigiinnut siulittaasoq Ken Madsen oqarpoq.
Kommuneqarfik Sermersuup missingersuutai tamarmiusut 2,2 milliarder koruuninik naleqarput. 2023-mi kommunimut akileraarut allanngortinneqarani 26%-iuginnassaaq.
Missingersuutinut isumaqatigiissut tamakkerlugu atuarsinnaavat, uani.