Sapaammi ullaassakkut Tasiilaq Piteqqamit sakkortuumit eqqugaavoq, taamaattorli piareersarluarnerup ataatsimooqatigiinnerullu ajunaarnersuup ajornerunissaralua pinngitsoortippaat.
”Nunap assingini silassami Piteraq takkutissasoq takusinnaasimavarput, taamaattumillu kommunimi sulisut sapaatip akunnera tamakkerlugu sakkortuumik silarlunnissaanut piareersarsimapput. Qatserisartut sillimallutik upalungaarsimasimapput, annertoqisumillu suliniuteqarsimallutik Tasiilamili innuttaasut aamma ikioqatigiinnerminnut assut nersualaarneqartariaqarput,” Tasiilami immikkoortumi pisortaq, Hjørdis Viberg oqarpoq.
Suli anorersualinngitsoq qatserisartut piareeqqapput, kalerrisaarutinillu pissarsiniariarlutik qisuariartarlutik. Kalerrisaarutit amerlanerpaartaat innuttaasunit inissiaminni igalaaminnik aserortoorsimasunit, matunik katatsisoorsimasunit imaluunniit arlaatigut inissiaminniissinnaajunnaartitsisunik nalaataqarsimasunit pipput. Taamaattumik qatserisartut unnukkut anorersuartoq angalasaqattaartariaqarsimapput innuttaasullu katersortarfimmut qimagussuullugit.
Upalungaarsimasut kalerrisaarutinik 70-inik pissarsipput, innuttaasullu 47-t qimagussuunneqarlutik. Innuttaasut 30-t katersortarfiliaanneqarput innuttaasullu 13-it ilaqutaasunut allanut biiliunneqarlutik, ilaqutariillu ataatsit napparsimasumik meerartallit napparsimaviliaanneqarlutik.
Katersortarfimmut qimagussuunneqartunut Ilaatigut siniffiit patitsittakkat sinngup puuilu atugassanngorneqarput. Taakku upernaami NunaFondenimit aningaasalerneqarput, ajunaarnersuaqarneranilu upalungaarsimanissamut ilaasussaasut piareersimatinneqarlutik.
Upalungaarsimanermi pisortaq Jes Damgaard Andersen Tasiilami pisut pillugit ima itisiliivoq: ”Piteqqamut iliuusissatsinnik pilersaarusiornikuuvugut, kikkullu tamarmik pilersaarummik malinnipput. Massakkumut anorersuarnerani inunnik ajoqusersimasunik nalunaaruteqartoqanngilaq, Tasiilallu nunaqarfii anorersuarnerani annerusumik ajutoorfiusimanngillat. Illoqarfiup aqquserngi ingerlavigineqarsinnaapput, sapaatillu akunnerani tulliuttumi aamma sakkortuumik silarluttussaammat, kommunimi sulisut atortunik sapinngisamik amerlanerpaanik pitsanngorsaallutik aallartereerput, taamaalillutik ulluni tulliuttuni sialuk anorilu annertunerusumik ajoqusiinnginnerussammata.”
Immikkoortumi pisortap Hjørdis Vibergip innuttaasut piffissami aggersumi apeqqutissarpassuaqarnissaat eqqumaffigaa, imatullu naggasiilluni: ”Ataatsimoornerput nukittussutigaarput. Ikioqatigiittarpugut. Siornani taamaattarsimavugut, massakkullu aamma taamaassaagut. Ataasinngornermi unnukkut 19.00 katersortarfimmi naapissaagut, tassanilu suliamik suliaqartut tarnillu pissusaanik ilisimasallit najuukkumaarput innuttaasullu toqqissisimanngitsut pisut pillugit ikiorserneqarsinnaassallutik apeqqutissaminnillu akineqarsinnaassallutik.”