Kommuneqarfik Sermersuup Tasiilami takornarianut paasissutissiivik Skærvenimiittoq aalajangersimasumik ammasarfilerlugu ammaqqippaa. Sumiiffimmi takornarialerisup pitsaasutut isigaa kommunimillu pitsaanerusumik suleqateqarnissani qilanaaralugu.
Illu B-48 Skærven siornatigut aningaasaateqarfik Destination East Greenlandimit ingerlanneqarsimasoq qanittukkut Kommuneqarfik Sermersuup tiguaa.
Piffissap sivikitsup iluani kommunip Tasiilami illu illoqarfiup qeqqaniittoq takornarianut paasissutissiivinngortippaa, ullut tamaasa ammasartoq. Takornarianut takusassat asiarnerillu takornarianut tulluuttut nassaariuminarnerulernissaat eqqarsaataavoq.
”Takornariat iserfigisinnaasaannik tunisassiaatitsinnillu paasissutissanik aallerfigisinnaasaannik allaffittaarnerput ineriartorneruvoq pitsaasoq. Takornariartaatsit tikinneranut suleqatigiillualereerpugut” Rasmus Poulsen Tasiilaq Toursimik piginnittoq oqarpoq.
Suliassap suliarinissaanut sulisunik marlunnik assistentinillu marlunnik atorfinitsitsisoqarpoq, illoqarfiup tikeraartuinut qungujulaarlutik tikilluaqqusinissaminnut piareersimasunik sumiiffimmullu tunngasunik ilisimasaqarluartunik. Soorunami Tasiilamut tunngasuinnaanngitsunik aammali nunaqarfinnut pinngortitamullu kusanartumut tunngassaaq aammali minnerunngitsumik Tasiilami takornarialerisunut aamma nioqqutissaatigineqartut paasititsissutigineqassapput.
Takornarianut paasissutissiivik ammasassaaq ataasinngornermiit – tallimanngornermut 10.00-12.00 aamma 14.00-16.00.
Arfininngornermi sapaammilu ammasarfiit 10.00-14.00.
Destination East Greenland qimataqarpallaarsimanngilaq, kisianni kommunimi sulisut aasaanerani suliniuteqarneratigut nuannisarnissamut paasissutissanullu inissaqalerpoq.
Aaqqissuussinerup siulliup assitai ataani takuneqarsinnaapput. Aappaagumut takornariaqaleqqinnissaanut aaqqissuussineq pitsanngorsaavigineqassaaq.
