Angajoqqaajusoq Paarma Rosvig Pedersen ”Meeqqeriviit pitsanngorlit / Bedre institutioner”-mik atserlugu atsiortitsinermik aallartitsivoq, meeqqeriviit pitsanngorsarneqarnissaannik siunertalimmik.
Sermitsiaq.ag naapertorlugu, Kommuneqarfik Sermersuumi Borgmesterip Avaaraq Olsenip meeqqerivimmi pissutsit pillugit ataatsimeeqatiginissaa, Paarma Rosvig Pedersenip anguniagaasa ilagaat. Kissaatigineqartoq sukkanerpaamik eqquutsinneqassaaq.
”Paarma Rosvig Pedersen assut ataatsimeeqatigerusuppara. Meeqqerivitta qanoq pitsanngorsarneqarsinnaanerinut isumassarsiallit tamaasa ataatsimeeqatigerusuppakka. Uanga nammineq meeqqanut marlunnut Nuummi meeqqerivinniittunut anaanaavunga, taamaattumillu nammineq sulisussaaleqinerup meeqqanut angajoqqaanullu sunniutai misiginikuuakka, uannullu ajornartorsiutit sukkasuumik aaqqinneqarnissaat pingaarutilerujussuuvoq.”, Avaaraq Olsen oqarpoq.
Aaqqiissutissatut siunnersuutinik suliaqarpoq
Borgmesterip meeqqami meeqqeriviani sulisussaaleqisoqarnera pissutigalugu, meeqqami suliffimminut ilagisariaqartarnerat misilereersimavaa. Sulisussaaleqinerup aaqqiissuteqarfigineqarnissaa assut pingaartippaa, kisiannili inuiaqatigiit sulisussaaleqisarnerat suliassarujussuusoq ilisimavaa.
”Piffissami sivitsortumi meeqqerivitsinni naammattunik atorfinitsitsinissatta ajornakusoorsimanera isertugaanngilaq, tamatumali tunniutiinnartinngilaatigut. ingerlatsivik suliniutinik nutaanik, pissutsinik pitsanngorsaataasussanik suliniuteqartuaannarpoq”, Avaaraq Olsen oqarpoq.
Angajoqqaat ikiuunnissaannik qinnuigai
Suliniutit kommunalbestyrelsip aqagu suliarisassaata ilaat: Suliniut, Perorsaasut inimut aalajangersimasumut pituttorsimanngitsut-mik taaguuteqartoq, aaqqissuussineruvoq, meeqqerivinnut perorsaasumik ataatsimik, perorsaanermi suliniutinik, nalinginnaasumik ass. sulisussaaleqisoqarnera pissutigalugu piffissaqarfigineqartussaanngikkaluanik tapersiisussamik aallartisaasussamillu tunisisussaq.
Perorsaasut inimut aalajangersimasumut pituttorsimanngitsut pillugit aaqqissuussineq meeqqerivinnik ulluinnarni perorsaanikkut kivitsissaaq. Meeqqat imartunerusumik ulluinnaqartinneqarnissaat kiisalu suliffimmi avatangiisit pitsanngorsarneqarnissaat naatsorsuutigineqarpoq. Suliffimmi avatangiisit pitsanngorsarumallugit meeqqerivinni aqutsisut tamarmik siorna aqutsinermik pikkorissartinneqarput, ukiallu ingerlanerani suliassaqarfimmi immikkoortumut pilersaarummik, ulluunerani paaqqinnittarfinnik pitsanngorsaanissamut suliniutinik amerlasuunik imalimmik saqqummiisoqassaaq
Ulluunerani paaqqinnittarfiit assut pingaartitaraakka. Aappaagu missingersuusiornitsinni isumassarsiat pitsaanerpaat ilanngunneqarnissaat qulakkeerumallugu, angajoqqaat sunik siunnersuuteqarusunnersut aperissallugit aalajangernikuuvunga, sukumiisumik suliniutit suut kommunimit aallartisarneqarsinnaanersut pillugit. Taamaattumik massakkut innuttaasumik peqataatitsinermik, kikkut tamarmik isumassarsiaminnik ilanngussivigisinnaasaannik aallartitsivugut”, Avaaraq Olsen oqarpoq.
Innuttaasunik peqataatitsineq Kommuneqarfik Sermersuup innuttaasunik peqataatitsinermut quppernerani kommuneqarfiga.gl-imi ingerlanneqassaaq, sapaatillu akunnerata matuma ingerlanerani nittartakkamiilissalluni.