Pætur Jørðdal Niclasen aggustip aallaqqaataani naatsorsuuseriffimmi pisortatut sulilerpoq. Pætur Aatsitassanut Inatsisillu Atuutsinneqarnerannut Naalakkersuisoqarfimmi regnskabs- og serviceafdelingianiit nuulluni sulilerpoq.
Ukiut arfineq-marluk Namminersorlutik Oqartussanereerluni, Pætur Jørðdal Niclasen aggustip aallaqqaataani kommunimi naatsorsuuserinermi immikkoortortami naatsorsuuseriffimmi pisortatut sulilerpoq.
”Aallartilluarnissannut qilanaaqaanga. Inuit inussiarneqaaq, aamma suliffeqarfik suliffigissallugu nuannerpaseqaaq”, Pætur Jørðdal Niclasen oqarpoq.
Pætur Copenhagen Business Schoolimi finansiering og regnskab ilinniarsimavaa (cand. Merc.-iulluni), Pæturilu ukiut qulit missaani aatsitassarsiornerup silarsuaani sulisimavoq. Siullermik Savalimmiuni Statoilimi suleriarluni Namminersorlutik Oqartussat Aatsitassanut Naalakkersuisoqarfiani sulisimalluni. Maanna kommunip naatsorsuutaanik akisussaasunngussaaq, Pæturilu kisitsisilerinissaminut aammalu kommunip aningaasaataanik akisussaasuulluni suliaqalernissaminut qilanaarpoq.
“Maanna ilinniarsimasannut “uteqqippunga”, tassani naatsorsuuserinermi suliaqartussanngorlunga. Soorunami Namminersorlutik Oqartussani suligallarama naatsorsuuserinermik suliaqartarpunga, kisianni taamak annertutiginngitsumik. Taamaammat sulilernissannut qilanaartupilussuuvunga” Pætur oqarpoq.
Suleqatigiittut (teamitut) suleqatigiinneq pitsaanerpaamik ingerlassappat Pæturimut pingaarutillit marluk taavai.
“Imaassinnaavoq soqutaanngitsutut nipeqarsinnaasoq, kisianni systemit sulisut ulluinnarni atortagaat ajunngitsumik ingerlasariaqarput. Aamma pingaaruteqarpoq sulisut akunnerminni ataqatigiilluarnissaat aammalu suliffimminni ilorrisimaarinninnissaat. Taakku pisortatut piviusunngortissinnaagukkit naammagisimaarinnissaanga”, Pætur Jørðdal Niclasen naggasiivoq.
Pætur naalakkersuisoqarfimmi suliani tamani pisortamut tullersortaasimavoq, maannakkulli kommunaldirektørip tullersortaa Marie Fleischer qaninnertut pisortarisussanngorpaa.