Kommunalbestyrelsip ataatsimiinnerani kingullermi politikerit isumaqatigiissutigaat assammik arsartartut kattuffiat TAAK 1 million koruuninik tapiiffigissallugu, taakkua arnat assammik arsarlutik VM-ernissamut anngunniunnissamik aaqqissuisuusussaapput. Kattuffiup siulittaasuata Carsten Olsenip tapersersorneqarneq, illoqarfigisamilu unamminissamut periarfissinneqarneq nuannaarutigaa.
Aappaagu arnat assammik arsarluni VM-ernissamut anngunniunnissaminni ilisimariikkaminni tapersersorneqarnissartik qilanaarisinnaavaat. TAAK-mi anngunniunnermik aaqqissuisuussaaq, tamannalu siulersuisut siulittaasuata Carsten Olsenip nuannaarutigaa, kommunillu 1 millioninik tapiissuteqarnera tapersersuinitsialattut oqaatigalugu.
“Pingaaruteqarluinnassaaq. Assammik arsarnerinnarmuunngitsoq, siammasinnerusumili inuiaqatigiinnut aamma. Assersuutigalugu PANAM 2018-imi takuarput, nunarput ataatsimoorussaqalermat” Carsten Olsen oqarpoq.
Politikkeritut akisussaassuseqartup Meeqqanut Atuarfeqarnermullu Ataatsimiititami siulittaasup Juaaka Lyberthip eqqarsartariaaseq tamanna pingaartippaa.
”Assortorneqarsinnaanngilaq assammik arsarneq kommunitsinni nunatsinnilu timersuutaasoq pingaarutilik. Taamaattumik nuannaarutigaara unammiuaarnissaq kommunalbestyrelsimit tapersersorneqarmat. Timersortartunut isiginnaartunullu iluaqutaassaaq, annertuunik misigisaqarnissaminnut qilanaarsinnaapput” Juaaka Lyberth oqarpoq.