Meeqqanut Atuarfeqarnermullu Ataatsimiititami siulittaasoq, Juaaka Lyberth, Tasiilami ilinniartitsisussaaleqinermit arlaatigut kalluagaasunik arlalinnik ataatsimeeqateqarsimavoq. Siulittaasoq aaqqiissutaasinnaasunik arlalissuarnik siunnersuutissaqarluni uterpoq. Kissaatigineqartuni annerpaaq tassaavoq najugaq qimannagu ilinniartitsisutut ilinniartitaaneq.
Tasiilami ilinniartitsisunik atorfinitsitsiniarnermi suliaq ataatsikkut assigiinngitsut aqqutigalugit ingerlavoq. Assersuutigalugu Juaaka Lyberth, Meeqqanut Atuarfeqarnermullu Ataatsimiititami siulittaasoq Tasiilameeqqammerpoq pissutsit qanoq inissisimanersut qanimut suullu pisariaqartinneqarnersut paasiniarlugit.
Kaffisorusaajutaa oqaloqatigiinneq
Juaaka Lyberth ataatsimiititsisarpoq ”kaffisorusaajutaa oqaloqatigiinneq” qulequtaralugu, illuatungeriit arlallit ilinniartitsisut amigaataanerannit kalluarneqartut ataatsimeeqatigisarlugit. Pineqarput angajoqqaat, Tasiilami Alivarpimmi maannakkut ilinniartitsisuusut aammalu atuarfimmi aqutsisut.
”Ataatsimiinnerit pissarsiaqarnartupilussuupput, aammalu angajoqqaat, ilinniartitsisut aqutsisuusullu nersualaartariaqarput. Naapikkuminartorujussuupput. Unamminiagassat kisiisa pinnagit aammali aaqqiissutissanik siunnersuutissaqartaramik. Ataatsimiititamut, ingerlatsivimmut minnerunngitsumik Naalakkersuisunut suliassanik ingerlateqqitassanik tunniussaqartorujussuupput” Juaaka Lyberth oqarpoq.
Ilinniagaqarnissamut aporfiit piiarneqartariaqarput
Isumalluutit ilagaat timelærerit puigorneqartartut, pikkorissartinneqarsinnaasut. ”Timelærerinik arlalinnik pikkorissunillu peqarpugut, taakkulu ilarpassui pikkorissaqqikkusupput, ajoraluartumilli aporfissaqartarput, taakkulu piiarusuppavut,” ataatsimiititap siulittaasua oqarpoq.
Timelærerit Tasiilami ilaqutaqarlutillu najugaqarajupput, ilinniartitsisutut ilinniagaqarnissaq pilerigalugulu nukissaqarfigigaluarlugu suut tamaasa aaqqissinnaanngilaat, taamaassappat Tasiilaq qimallugu ilinniariartortariaqassagamik. Taamaattumik najugaq qimannagu ilinniartitsisunngorniarnissap pilersinneqarnissaa periarfissaasoq eqqaaneqarpoq.
Peqatigitillugulu ilaasa ilinniakkamik ilaani danskisut piginnaasaqarnissamik piumasaqaatitalinni ikorfartorneqarnissaq pisariaqartissavaat. Tassunga tunngatillugu eqqaaneqarpoq Majoriaq suleqatigilluarneqarsinnaasoq, tassannga ikorfartuisoqarsinnaammat.
Arlalinnittaaq eqqaaneqarpoq siunissaq eqqarsaatigalugu ilinniartitsisussaaleqinermut ikiuutaasinnaasoq inuusuttut Tasiilami najugaq qimannagu GUX-mi atuarnissamut periarfissaqalerpata.