Saliinermi aningaasartuummik missingersuutaanngitsumik nassaartoqarpoq
Ukiut marluk matuma siorna sermersooq.gl-imi atuarneqarsinnaasimavoq Kommuneqarfik Sermersooq Munkgruppimiit asfaltiliorfik tigussagaa. Tamannalu nutaarsiassatsialaavoq, pissutigalugu kommune pitsaasumik neqeroorfigineqarami Nuummi asfaltiliorfiup aserfallassimasup nutarternissaanut periarfissaqarlualermat. Suliaqarsinnaassuseq pingasoriaatinngorpoq Paamiunullu asfaltimik assartuisoqarsinnaalerluni. Kommunimut alloriarneq annertooq.
Ukiut marluk qaangiummata Kommuneqarfik Sermersooq Munck Gruppip asfaltiliorfianik atuilerpoq, tamannalu aamma isumaqatigiissutinut ilaavoq. Ajoraluartumik sanaartornermut tunngasuni saliinerup massakkut ingerlasup takutippaa Sanarfinermut Avatangiisinullu ingerlatsivimmi suliatigut kukkusoqarsimasoq. Kommunalbestyrelse asfaltiliorfimmut alakkarterisimavoq Kommunalbestyrelsip immikkut sammisaqarnerani aamma Sanarfinermut Avatangiisinullu Ataatsimiititamit eqqartorneqarmat, kisianni asfaltiliorfik Kommunalbestyrelsimi inaarutaasumik akuerineqarnikuunngilaq.
”Pissusissamisuunngitsunik nassaaqqaaratta ingerlatsivimmut ersarissumik nalunaaruteqarpunga suna tamaat misissortissallugu saqqummiunneqassasullu. Sulisunut kukkunermik nassaarsimasunut uannullu ingerlatitseqqissimasunut qujarusuppunga”, Chalotte Ludvigsen, oqarpoq.
Asfaltiliorfik katillugu akeqarpoq 20 million koruunit. 7,5 millionit koruunit siulliit missingersuutineereersunit akilerneqarpoq. Ataasinngornermi Kommunalbestyrelse 2023-mut aningaasartuutit sinneruttut missingersuutinut ilanngunneqartunut siullertut alloriassapput.
Aprilimi 2020-mi pisinissaq isumaqatigiissutigineqarmat, Coronamik tuniluunnersuaq aallarteqqammerpoq politikkikkullu ataatsimiinnissat ingerlanneqarnissaannut pilersaarusiornissaat ajornakusoorsimallutik. Pisineq kingornatigut politikkikkullu suliarineqaqqittussaasimagaluarpoq 2021-mut missingersuummut ilanngunneqarnissaa siunertaralugu.
”Soorunami suliami pingaaruteqarluinnartumi kukkusoqarsimanera assorsuaq uggoraara, massakkullu pingaarneruvoq kukkuneq nanineqarmat pissutsillu aaqqiivigisinnaagatsigit. Tamarmik isumaqatigiipput nutaamik asfaltiliorfimmik pisariaqartitsisugut, maannalu akiliinissaq qulakkeertariaqarparput”, Charlotte Ludvigsen oqarpoq.
Kommuneqarfik Sermersuup iluani saliisoqarneranut atatillugu kukkuneq nanineqarpoq sulisullu suliaqarnermi peqataasimasut atorfimminniikkunnaareerput.
Pisinermi isumaqatigiissut piaarnerpaamik Aningaasaqarnermut Inuussutissarsiornermullu Ataatsimiititami aamma kingornatigut Kommunalbestyrelsimut saqqummiunneqassaaq.