Nuummi qimarnguiup pitsanngorsarneqarnissaa politikerinit kissaatigineqarpoq, taamaalilluni amerlanernik saniatigut pitsaanerusumik ikiuinissamut neqerooruteqalerniassammat. Taamaammat perorsaasutut sulisussamik aamma tarnikkut katsorsaasartumik atorfinitsitsinissamut aningaasassaqartitsisoqalerpoq, tamannalu politikerinut sulisunullu nuannaarutaavoq.
Qimarnguimmi Nuummiittumi 2021-mi katsorsaanermut neqeroorutit annertusineqarput, maannalu 2022-mi neqeroorutit annertusineratigut sulisut perorsaasumik tarnikkullu katsorsaasartumik amerlineqarnissaat pilersaarutaalerluni. Missingersuutinik isumaqatigiinniarnermi akuersissutigineqartut ilagaat, tamannalu borgmesterimut assut nuannaarutaavoq.
” Angerlarsimaffinni persuttaasarneq inuiaqatigiinni ajornartorsiutigigipput eqqumaffiginerulertariaqarparput. Ajoraluartumik ajornartorsiut ilisarnartuuvoq, assigiinngitsorpassuartigut akiugassaavoq. Arnat persuttagaasartut persuttagaasarunnaarnissaat pillugu iliuuseqarnerusariaqarpugut. Angerlarsimaffimmi persuttaasarneq sorpassuarnut tunngasinnaavoq, aamma timikkut annersaanerinnaanngilaq. Aamma tarnikkut persuttaaneq aningaasanullu attuumassuteqartumik persuttaanerit pineqarput. Persuttaasarnermi arnaq kisimi eqqugaaneq ajorpoq. Meeqqattaaq angerlarsimaffimmi persuttaanerup kingunerisaanik sakkortuumik misigitinneqartarput. Taamaammat ilaqutariit tamaasa isumagissallugit pingaaruteqarpoq – persuttaasartoq ilanngullugu. Angerlarsimaffinni persuttaasarnerup sutigut tamatigut akiorniarnera sulissutigiuassavarput”, Borgmesteri, Charlotte Ludvigsen, oqarpoq.
Qimarnguimmi maannakkut sulisuusut akornanni naammagisimaarinninneq ersarippoq.
”Maannakkorpiaq arnamut timikkut tarnikkullu persuttagaasimasumut amerlanerpaamik oqaloqatigiinnernik pingasunik neqerooruteqarsinnaavugut, tassami Kommuneqarfik Sermersuup qimarnguiani Nuummiittumi sisamaannarnik sulisoqaratta. Arnat meeqqallu akornanni pisariaqartitsineq annertummat, perorsaasumik tarnikkullu katsorsaasartumik atorfinitsitsinissarput assut qilanaaraarput” tarnikkut katsorsaasartoq, Julia Dorph Lyberth, taama oqarpoq. Taanna isumaqarportaaq saniatigut perorsaasumik atorfinitsitsineq pingaaruteqartuusoq, taannami pisuni assigiinngitsutigut ikiuussinnaammat taavalu anaanaasumut qitornaasumullu qimarnguimmiittunut ikorfartuutaasinnaalluni.
Qaammatini pingasuni pinartoqartillugu sumiiffissaqartitsinermut neqeroorutaasup saniatigut qimarnguik periutsimik nutaamik atulersitsinikuuvoq, ilaatigut qaammatini arfinilinni katsorsaanermik ingerlatsisoqarnissaa pineqarluni. Persuttaasarnerup unitsinneqarnissaa anguniagaavoq, taamaalillutik arnat ilaqutariinni persuttaasarneq uterfigeqqissanngimmassuk.