Piffissami kingullermi Tasiilami sanaartorneq sukkasuumik ingerlanneqarpoq, ukiunullu tulliuttunut missingersuutinut isumaqatigiissutini Kalaallit Nunaata kangiani illoqarfiit annersaanni sanaartornerulernissaq siunertaavoq. Tamanna pillugu missingersuutinut isumaqatigiissummi Tasiilami sanaartornermut ilisimasalimmut atorfinitsitsinissamut aningaasaliisoqarpoq.
Tasiilaq qatserisartoqarlunilu, puttasoqarpoq kiisalu maanna umiatsianut inissiisarfissaq titartarneqaleruttorpoq, tamatumalu saniatigut Kulusummi iliveqarfissaq nutaaq suliarineqarnissaa qanillivoq, tamannalu pillugu kommunimi sanaartornermut immikkoortortaqarfiani naammattunik suliassaqarpoq.
”Kommunalbestyrelsip qangali Tasiilami eqqaanilu sanaartorneq annertusisimanera maluginiarpaa. Taamaattumik illoqarfimmi najugalimmik sanaartornermik ilisimasalimmik atorfeqartoqarnissaanut siunertaq pitsaasuuvoq” borgmesteri Charlotte Ludvigsen oqarpoq, naammagisimaaralugulu aningaasat nassaarineqarsimasut.
Sanaartornermi ilisimasallit soorunami sumiiffimmi sanaartornissamut suliassat isumagisassarissavai, tamatumali saniatigut illut pioreersut qanoq issusai nalilersortassallugillu aserfallatsaaliornissamut suliassat pilersaarusiortassavai. Matumani kinguneratigut ajortissinnaasut qulakkeerniarlugu taamaaliortoqartassaaq, tamannami kingorna aningaasartuutaanerulersinnaavoq.
Pilersaarutit malillugit atorfik ukiumi nutaami inuttassarsiuunneqassaaq.