Paamiuni timersornerup ullua, timersortartut 2021-imi immikkut takutitsisimasut akissarsitinneqarnerat, innuttaasunit najuuffigineqarluarpoq.
Kunngit pingasut ulluanni Paamiuni timersortarfimmi Timersornerup ullua nalliussineqarpoq, inuttaasunik najuuffigineqarluni. Aaqqissuussineq akunnerit ataaseq affarlu missiliorlugu sivisussuseqarpoq, ukiup siuliani pisimasut eqqartorneqarlutik, ukiumilu nutaami pilersaarutit saqqummiunneqarlutik, kaffe, the kaagillu amiganngeqisut sassaalliutigineqarlutik.
Taassuma saniatigut Paamiuni Nipilersornermut ilinniarfimmit meeqqat nipilersoqatigiit pikkoreqalutik pingasoriarlutik nipilersorput, tusarnaartunit nuannarineqaqisumik.
Soorunami ukiumi qaangiuttumi angusimasat pitsaasut nersorniarneqarput, ataanilu allassimasut, nersornaatisisut, tamarmik pokalinnapput eqqumiitsuliortumit Appa Mathiesen Eliassen-imit suliarineqarsimasunik.
Timersullammak 2021 – Nick Hermansen, Nagtoralik isikkamik arsartartut.
Piukkunnaatilik 2021 – Nicki Olesen, Nagtoralik isikkamik arsartartut.
Sungiusaallammak 2021 – Andreas Geisler, Paamiut TaeKwondo.
Iligiillammaat 2021 – Nagtoralik Futsal Herre senior.
Aqutsillammak 2021 – Andreas Geisler, Paamiut TaeKwondo.
Kajumissaat 2021 – Naja Jakobsen, Nagtoralik Håndbold.
Aaqqissuussaq nal. 14.30 miss. Timersortarfiup silataani qummoroortarnermik naggaserneqarpoq.
