Kommuneqarfik Sermersuumi pisortaqatigiit atorfinitsitsiniarnermut atatillugu pingasoriarluni oqaloqatiginnereernerup kingorna tamakkeqqipput. Borgmesterip, Charlotte Ludvigsenip, atorfinitsitsinissani ataatsimiititani pingasuusuni ataatsimeeqataasartup angusaq assut naammagisimaarpaa.
”Suliap ingerlanneqarnera assut pitsaasimavoq. Piukkunnaateqarluartunik toqqagassaqarsimavugut, piukkussatullu toqqakkatta suliassaqarfinnik siuttuuffigiligassatik pillugit takorluukkaminnik saqqummiinertik torrallattarsimallugit,” borgmesteri, Charlotte Ludvigsen, oqarpoq.
Atorfiit pingasut inuttalerneqartussat tassaapput kommunaldirektøri, Meeqqanut Ilaqutariinnullu Ingerlatsivimmi pisortaq aamma Sanarfinermut Avatangiisinullu Ingerlatsivimmi pisortaq.
Atorfinitsitsinerni tamani atorfinitsitsinissat tamaasa atorfinitsitsinissamut ataatsimiititamit tamakkiisumik taperserneqarput.
Kommunaldirektør Ole Jakobsen
Ole Jakobsen kommunaldirektørinngussaaq. Danmarkimi Guldborgsundip Kommuniani Projekt- og Økonomidirektøriuvoq atorfeqartarnerminilu Danmarkimi aamma Kalaallit Nunaanni aqutsinikkut allaffeqarfinnilu suliuartarsimavoq.
”Nuummi sulinikuuvunga Kalaallillu Nunaanni angerlarsimasutut misiginikuullunga, taamaammat uterlunga kommunimi suliassarpassuit pillugit aallartinnissannut assut qilanaarlunga”, Ole Jakobsen oqarpoq.
Kommunalbestyrelsip politikkikkut takorluugaata piviusunngortittarnissaat Ole Jakobsenip kommunaldirektøritut suliffimmi akisussaaffigilissavaa. Akisussaaffiit ilaat tassaassapput inissiat amerlanerusut, ilaqutariit atugaat pitsaanerusut aamma pisortani pitsaanerusumik kiffartuussineq.
“Sermersooq kommuniuvoq ineriartupiloortoq. Ineriartorneq ingerlatiinnassaaq aamma innuttaasut inuussutissarsiuteqartullu kiffartuunnissaannut neqeroorutivut pitsanngorsarlugit. Nuummiikkallarnernit ilisimasara tassaavoq nuna tamakkerlugu ineriartortitsinermut kommune qanoq qitiusutut pingaaruteqartiginersoq, akisussaaffiullu tigumminissaa nammineerlunga pimoorulluinnarpara”, kommunaldirektørinngortussaq taama oqarpoq.
Ole Jakobsen novembarip ulluisa 15-ianni atorfinissaaq.
Meeqqanut Ilaqutariinnullu Ingerlatsivimmi pisortaq: Martha Abelsen
Meeqqanut Ilaqutariinnullu Ingerlatsivimmi pisortanngortussaq, Martha Abelsen, Kommuneqarfik Sermersuumi amerlanerpaanit ilisarisimaneqarpoq. Taannaavormi ukiorpassuarni kommunalbestyrelsimut ilaasortaasimasoq kommunimilu allatseqarfimmi pisortatut atorfeqarsimasoq. Martha Abelsen socialpædagogitut ilinniagaqarpoq isumaginninnerullu iluani ukiuni arlalissuarni aqutsinerup tungaatigut suliaqartarsimalluni. Kingullermik Namminersorlutik Oqartussat Isumaginninnermut Aqutsisoqarfiani immikkoortortami aqutsisuuvoq.
”Isumaginninnermut tunngatillugu unamminartorpassuupput. Aamma Kommuneqarfik Sermersuumi taamaappoq, taamaattoq unamminartorpassuit taakkuupput oqartussaqarfiit attuumassuteqartut peqatigalugit suliarisinnaasavut suliarisariaqakkavullu. Meeqqat tamaasa sumi najugaqaraluartulluunniit ilaqutariinni kikkunniluunniit peroriartortut toqqissisimanartumik peroriartortinneqassasut pillugit sulerusussuseqarpunga”, Martha Abelsen oqarpoq.
Martha Abelsen novembarip ulluisa aallaqqaataanni atorfinissaaq.
Sanarfinermut Avatangiisinullu Ingerlatsivimmi pisortaq: Hans Ulrik Skifte
Sanarfinermut Avatangiisinullu Ingerlatsivimmi pisortanngortussaq, Hans Ulrik Skifte, DTU-mit arktisk ingeniøritut ilinniagaqarpoq atorfeqartarnerminilu kommunini aamma pisortat suliffeqarfiutaanni aqutsinermut tunngasunik suliaqartarsimalluni. Qeqqata Kommuniani Teknikkimut Avatangiisinullu pisortatut atorfeqarpoq siusinnerusukkullu Polaroil-imi sanaartornermut pisortaasimalluni. Maanna sanaartornermut missingersuutit ukiumut 300 millionit koruuninik aningaasartallit akisussaaffigilissavai.
”Sanaartorneq ineriartortitsinerlu pillugit suliffeqarusukkaanni qularutiginngilluinnarpara Kommuneqarfik Sermersooq pissanganarnerpaat anguniagaqarnerpaallu ilagigaat. Kommunimi inoqarfiit tamaasa kommunalbestyrelsimit ineriartortinneqarnissaannut siunnerfilerneqarsimasut siuttuuffigissallugit assut qilanaaraara”, Hans Ulrik Skifte oqarpoq.
Hans Ulrik Skifte aamma novembarip ulluisa aallaqqaataanni atorfinissaaq.
