Innovation Greenland aamma Sermersooq Business nuna tamakkerlugu Foodlab pillugu suleqatigiilerput, nerisassiornermi inuussutissarsiornikkut ineriartortitsineq annertusarniarlugu.
Foodlab Nuuk alliartuinnarpoq, taamaammat aasap ingerlanerani Foodlab Nuuk Foodlab Greenlandinngussaaq. Nerisassat najukkameersut imminullu pilersorsinnaaneq pillugit soqutigisaqarneq sammisaqarnerlu annertusiartortillugit, Innovation Greenland suliniummik aallartitsivoq neqeroorullu Kalaallit Nunaat tamakkerlugu annertusineqarluni. 2022-illu naanerani sulliviit Kalaallit Nunaanni Innovation Centerimi ininut nutaanut nuunneqassallutik. Innovation Greenland Innovation Centeriimi inissianik aallarnisaasartunut Nuup avataani najugaqartunut qassiinik najugassaqartitsissaaq.
Suliniummik alliliineq Sermersooq Businessimi Deputy Manageriusoqup Anne Nivíka Grødemip tamanna nuannaarutigaa.
”Foodlabeqartitsineq aallaaviatigut nerisassanut atatillugu aningaasarsiutissanik nutaanik pilersitsinissamut tunngavissiisuuvoq. Amerlasoorpassuit ulluinnarni inuussutissat najukkameersut atortarpaat angerlarsimaffimmilu nerisassioriaasitoqqat nerisassioriaatsillu nutaaliat misilerartarlugit. Kikkut tamarmik taamatut soqutigisallit Foodlabimut peqataatikkusuppavut, taamaaliornikkummi inuussutissarsiortut nerisassalerisut nutaat siunissami saqqummeralerniassammata.” Anne Nivíka Grødem taama oqarpoq.
September 2019-imi Sermersooq Businessip Nuummi FoodLab ammaqqaarpaa. Kommunip inuussutissarsiornermut immikkoortortaqarfiata kissaatigisimavaa suliniuteqarnikkut nerisassiorlutik aallarnisaasartut atugarisaat pitsanngorsarneqassasut, tassa tunisassiorfiit nerisassiorsinnaanermut akuerisat igammilu atortussat nerisassiortunut minnerusunut.
FoodLab pillugu www.foodlab.gl-imi paasisaqarnerugit
