IGASAp Paarisa, Unicef Grønland, Royal Greenland aamma FoodLab-ip Nuummi meeqqanik workshopeqartitsinerini Kommuneqarfik Sermersooq aaqqissueqataavoq. Sapaatip-akunnerata 26-p aamma 27-p ingerlaneranni meeqqat 100-t igaffimmi nuannisartinneqarput, tassanilu nerisassat peqqinnartut meeqqallu pisinnaatitaaffii ilitsersuutigineqartarlutik.
Atuarfiit matoqqaneranni, Nuummi meeqqanut inuusuttunullu aasaanerani neqeroorutit imaaginnavipput, iluatsitsiffiunerpaallu ilagivaat IGASAmit workshoppertitsinerit, taakkunani meerarpassuit 100-t sapaatit akunnerini marlunni neqeroorutip ingerlanerata nalaani peqataammata.
Workshoppertitsisoqarnissaani isumassarsiaq tassaavoq, meeqqat nerisassat peqqinnartut pillugit ilitsersuunneqarnissaat, meeqqallu pisinnaatitaaffii pillugit ilisimasaqarnerulersinneqarnissaat. Isumassarsiatsialaavoq, Kommuneqarfik Sermersooq, Paarisa, Unicef Grønland, Royal Greenland aamma FoodLab tamarmiullutik assigiinngitsutigut tunniusseqataasinnaammata.
”FoodLab´imi tulluusimaarutigaarput, suliffeqarfiit suliniaqatigiiffiillu akimorlugit suleqatigiinnikkut meeqqat nerisassiornermik nuannarisaqartut 100-t Foodlab´ip igaffiani ulloq ataaseq sammisaqartinneqarsinnaammata. Meerarpassuit peqataasut qutsavigaavut, ataatsimoorlutalu kivitseqatigiinnissatsinnut suleqatitsinnut qujanarujussuaq”, Foodlab´imi aqutsisoq Anne Nivíka Grødem oqarpoq.
Ilitsersuinertaani Maria Motzfeldt aqutsisuuvoq, nerisaqarnissamullu siunnersuutinit quliusunit aalisakkanik nerisaqarnissamik siunnersuut pingaarnerutinneqarpoq. Meeqqat quliniit aqqaneq-marlunnut ukiullit peqataaneranni ilisimasat tamakkua ingerlateqqinneqarnissaat pingaaruteqarpoq, tassami ilisimatusarnikkut paasineqarmat, taakkorpiaat pillugit ilisimasaqalerunik siunissami peqqinnarnerusunik nerisassiortalernissaminnut aalajangersinnaanerulissammata.
