Kommunaldirektøri Lars Møller-Sørensen aamma Sanarfinermut Avatangiisinullu Ingerlatsivimmi pisortaq Hans Henrik Winther Johansen Kommuneqarfik Sermersuumi atorfimminnit suliunnaarput. Marluullutik paaseqatigiinnikkut isumaqatigiissuteqarlutik suliunnaarput.
”Larsip aamma Hans Henriup ukiuni kingullerni arlaqartuni kommunip ineriartorneranut annertuumik sullissisimanerat pillugu qutsavigerusuppakka, siunissamilu ajunnginnerpaanik kissaallugit”, borgmesteri Charlotte Ludvigsen oqarpoq.
Kommunaldirektøritut atorfik piaarnerpaamik inuttassarsiuunneqassaaq, Sanarfinermut Avatangiisinullu Ingerlatsivimmi pisortamik atorfinitsitsiniarnermi kommunaldirektørinngortussaq peqataaniassammat, pisortatut atorfik kingusinnerusukkut inuttassarsiuunneqarumaarpoq.
Stabschefi Alex Nørskov Sanarfinermut Avatangiisinullu Ingerlatsivimmi pisortaagallartinneqarpoq, vicekommunaldirektørilu Marie Fleischer kommunaldirektøriugallartinneqarluni.
Marie Fleischer kommunaldirektøritut atofimmut qinnuteqarnianngilaq taamaammallu atorfinitsitsiniarnermik ataatsimiititaliami suleqataassalluni.
Illuatungerisat allamik oqaaseqaatissaqanngillat