Eqqagassanik immikkoortiterineq inuiaqatigiinnut arlalitsigut iluaqutaavoq annermik avatangiisinut. Kommuneqarfik Sermersuumi suliffeqarfiit suliffissuillu piffissaq sivisulaartoq ingerlapput Ittoqqortoormiinili inoqutigiit immikkoortiterinermi aamma peqataallutik aallartipput. Innuttaasut pissusaat allanngortissagaanni qanoq iliortoqassanersoq kommuneingeniøri Kristian Hammeken nassuiaavoq.
2019-imi Ittoqqortoormiini eqqakkanik immikkoortitereriaatsimik annertuumik allannguisoqarpoq. Illoqarfimmi eqqagassanik ikuallaanerujussuaq qimallugu naqillugillu umiarsuakkut nassiussassanik immikkoortiterisoqalerluni, taamaalilluni avatangiisinullu mingutsitsinani allami kiassarnermi atortussanngorlugit isumagineqarsinnaalerlutik.
”Ikuallaanerinnaq piunnaarparput, tassanngaanniillu immikkoortiterinerulerpugut. Taamaattumik amerlasuut eqqaavissuarmi tipi siusinnerusukkut naamasakkaminnit allaanerusoq misigisaraat, Kommuneingeniøri Kristian Hammeken oqarpoq.
Pissutsinik allannguiniarneq sivisusinnaavoq
Eqqaavissuarmiinnaanngitsoq allanngortiterisoqarpoq. 2020-miit aamma inoqutigiit eqqagassaatitik uumassusilinneersut immikkoortitertalerpaat.
”Amerlasuut eqqaavitik silamiitikkusunnerusarpaat, ajoraluartumillu qimminit silap pissusaanillu sakkortuumik aserorneqartarlutik, tamatumalu kingorna amerlasuut pissusitoqqaminnut eqqakkanik immikkoortiterinatik aallarteqqittarlutik. Taamaattumik eqqakkanut inissiivinnik 19-inik pallitsit atoqqillugit sanaartussaagut, illoqarfimmi sumiiffinni assigiinngitsuni inissisimasussanik. Taava atortarnissaat sungiunniassavarput,” Kristian Hammeken oqarpoq.
Ataatsimoorussamik eqqaaveqarnissamut suliniut aallartereerpoq, sapaatip akunnerata ingerlanerani inissinneqassasut Kristian Hammekenip naatsorsuutigaa.
