Makku arlaannik ajornartorsiuteqaruit katsorsartissinnaavutit:
• Imigassaq
• Hashi
• Aningaasanoorneq
Ikiorserneqassaguit kommunimut sullissisunnut saaffiginnissaatit imaluunniit nunaqarfiup allaffianut saaffiginnissinnaavutit.
Katsorsartilerumallutit Allorfiup qitiusumik katsorsaaviinut toqqaannartumik aamma nammineq saaffiginnissinnaavutit.
Illoqarfinni ukunani Qaqortumi, Nuummi Sisimiuni, Aasianni, Ilulissanilu Allorfik katsorsaaveqarpoq.
Illoqarfinni najukkani amerlasuuni katsorsartinnissamut neqerooruteqartoqartarportaaq Nuummi Katsorsaavik suleqatigalugu, kiisalu aningaasanoornermut tunngatillugu Odense-mi aningaasanoorajunnermut qitiusumik katsorsaavimmi katsorsartinnissamut periarfissaqarluni.
Piumasaqaatit
Ikiorneqarsinnaavutit:
• Aanngajaarniutinik imaluunniit aningaasanoornermik ajornartorsiuteqaruit katsorsartinnissamillu kissaateqaruit
• Ilaquttavit arlaat aanngajaarniutinik aningaasanoornermilluunniit ajornartorsiuteqarpat
Akigititat
Katsorsartinneq
Aanngajaarniummik aningaasanoornermilluunniit ajornartorsiuteqarninnut katsorsartinnissamut innersuunneqaruit katsorsartinnissat akeqassanngilaq. Kommunerisannut saaffiginninnikkut innersuunneqassaatit. Nuummi katsorsartissaguit angalaneq ineqarnerlu Allorfiup/Atornerluineq pillugu Paasisimasaqarfiup akilissavai. Najukkanni kommunip iluani katsorsartissaguit kommunip angalaneq ineqarnerlu akilissavai.
Qanigisat katsorsartinneranni
Katsorsartittut tamarmik qanigisaat katsorsarneqarsinnaapput. Ilaquttavit ilaquttatut katsorsartinnissaq kissaatigippassuk illillu illoqarfigisavit avataani tamanna ingerlanneqassappat ilaquttavit angalanerat ineqarnerallu kommunip akilissavai.
Katsorsartinnissat ilaanni utaqqisoqarsinnaavoq.
Qinnuteqarneq
Katsorsartikkumaguit:
• Kommunimi sullissisunnut saaffiginnissaatit
• Kommunimi sullissisut innersuussinermi immersugassamik immersuissaaq taannalu Allorfimmut nassiullugu
• Kommunip, katsorsaasut pisariaqarpallu peqqinnissaqarfiup katsorsartinnissamut pilersaarummik suleqatigiissuteqarsinnaanissaannut akuersissummik kommunimi sullissisuit atsioqqussavaatit
• Inuunermut aanngajaarniutinik atuiffiunngitsumut ikaarsaarneq oqinneroqqullugu kommunimi sullissisup illit suleqatigalutit katsorsartereerninni qanoq ikiorserneqarnissat pillugu pilersaarusiussaaq
Ingerlatseriaaseq
Qinnuteqareeruit Allorfiup neqeroorummut ilinnut naleqquttumut innersuutissavaatit.
Inissaqalerniariarpat katsorsartinnissamut aggersarneqassaatit.
Ukiut pingasut tulliuttut ingerlanerini kommunini tamani katsorsaavinnik Allorfinnik pilersitsisoqassaaq. Aasianni, Sisimiuni, Nuummi Qaqortumilu katsorsaaveqarpoq. Illoqarfinni najukkani amerlasuuni Nuummilu Katsorsaavik Nuuk suleqatigalugu aamma katsorsaasoqartarpoq kiisalu aningaasanoornermut tunngatillugu Odense-mi aningaasanoorajuttunut qitiusumik katsorsaavimmi katsorsartinnissamut neqerooruteqarlunissaaq.